Os policías reclaman máis medios para loitar contra o preocupante aumento da ciberdelincuencia
Por Oskar Viéitez
O Sindicato Unificado de Policía (SUP) alertou do notable incremento dos delitos informáticos polo que reivindica máis medios e persoal para a súa prevención e investigación desta ciberdelincuencia.
Nunha rolda de prensa celebrada en Pontevedra, o secretario xeral do SUP en Galicia, Roberto González e a secretaria provincial do SUP, Sandra Fernández explicaron que, a día de hoxe, os delitos máis denunciados en calquera comisaría de Policía Nacional de Galicia son aqueles relacionados coa internet, constatando un notable incremento de ata un 20% destes feitos durante os cinco primeiros meses deste ano 2021.
Neste período, nas oficinas de atención á cidadanía onde presta servizo a Policía Nacional recolléronse 6.000 denuncias (2.500 na provincia da Coruña, 2.200 na de Pontevedra, 700 en Lugo e 600 en Ourense).
Roberto González indicou que a pandemia limitou o contacto social, incrementando o uso da internet, tanto nas relacións laborais como nas persoais, de lecer e tempo libre e "nese escenario o incremento dos delitos informáticos foi exponencial".
A pesar diso, "algúns particulares non denuncian por vergoña" ou pola pequena contía da estafa e "algunhas empresas tampouco o fan por temor a ver afectada a súa reputación". Ademais "as entidades bancarias poñen moitas trabas á hora de solicitar datos para investigar estes delitos", indicou Roberto González.
Segundo explicou o secretario xeral do SUP en Galicia, no que se refire aos delitos telemáticos hai que falar principalmente do phishing, é dicir, un correo malicioso que altera o dominio e que engana ao usuario utilizando unha imaxe e unha URL falsa para suplantar a identidade. O máis habitual nos últimos meses é o que se fai pasar por empresas de transportes ou por entidades bancarias. No primeiro caso, piden o pago adiantado para recibir un paquete e no segundo solicitan datos persoais dunha tarxeta ou conta para desbloquear a actividade das mesma.
SECUESTRO DO WHATSAPP
Os expertos na materia advirten de tres modalidades delituosas a través de internet que se están observando estas semanas e que son as relacionadas coa devolución dos ERTES, a campaña da RENDA e recentemente os secuestros da aplicación WhatsApp usando unha mensaxe dun contacto coñecido.
O SUP insiste en demandar ao Ministerio de Interior a "creación e potenciación de grupos de delitos tecnolóxicos en todas as comisarías, con especialización, formación e medios, tanto materiais, como persoais".
Roberto García advertiu de que neste campo, que avanza tan rápido, a Policía necesita actualización constante dos seus coñecementos e dos medios, xa que se está rexistrando un aumento de ataques cada vez máis complexos con crecente profesionalidade da cibercriminalidade. A miúdo, por mor da sofisticación do software malicioso, non é posible aplicar accións de defensa ou buscar as orixes dos ataques "co que aumenta a impunidade".
É por iso que o SUP considera que as forzas e corpos de seguridade do Estado, así como os membros da xudicatura e a fiscalía, necesitan ter, unha comprensión xeral das orixes, métodos e consecuencias deste novo tipo de delincuencia, fortalecendo a prevención e a investigación desta tipoloxía.
Conscientes desta necesidade o SUP Galicia colabora con Ara Formación na organización dun curso avalado pola Academia Galega de Seguridade Pública e dirixido de forma específica aos integrantes das forzas e corpos de seguridade. Segundo comentou o responsable deste curso, Arán Feijoo, o seu inicio está previsto para o 14 de xuño, en modalidade de teleformación, con apoio de aula virtual e conta con expertos docentes en diferentes campos.
Relacionadas:
-
A Garda Civil de Sanxenxo investiga dous veciños de Bilbao por unha ciberestafa
Por Oskar Viéitez |
-
As comisarías da Policía Nacional en Pontevedra, Marín e Vilagarcía incorporan novos efectivos
Por Oskar Viéitez |
-
A provincia retomará o próximo curso o Plan Director para a convivencia e a mellora da seguridade nos centros educativos
Por Oskar Viéitez & Mónica Patxot |
-
Aumentan as estafas online con tarxetas un 114% na provincia
Por Redacción |
-
RADIO.- Atención e precaución ante sms de descoñecidos ou identidades suplantadas
Por Marisa Ciordia |
-
Cinco denuncias en Pontevedra por intentos de estafa en nome dunha empresa de paquetería
Por Redacción |
-
O aumento das compras por Internet polo confinamento dispara un 32% as estafas leves por Internet en 2020
Por Redacción |