Tras a inauguración dos renovados Baños do San Xusto, o goberno municipal de Cerdedo-Cotobade decidiu completar o seu atractivo turístico cunha ruta de sendeirismo que unirá este enclave natural coa Ponte Nova de Fentáns.

Operarios municipais xa comezaron cos traballos de acondicionamento desta nova ruta, que contará cun percorrido que terá unha distancia de ida e volta de tan só 7 quilómetros e unha dificultade sobre o terreo media-baixa.

Deste xeito, o Concello busca fortalecer os Baños do San Xusto como destino turístico ofrecendo alternativas que fomenten as prácticas saudables, o desfrute da natureza e o coñecemento e divulgación do patrimonio etnográfico e cultural do municipio.

Nun futuro, segundo explicou o alcalde Jorge Cubela, a intención do Concello é estender  esta ruta de sendeirismo ata a área recreativa de Lodeiro, Campo Lameiro. Para iso, xa hai conversas co alcalde veciño para establecer un programa coordinado de actuacións.

O obxectivo é crear unha ampla rede de sendeiros transitables e de dificultade media-baixa para fomentar o fluxo turístico entre ambos os dous municipios.

"Cremos nas relacións de boa veciñanza e na interconexión das distintos lugares porque cremos que se poden converter nun destino xeoturístico moi importante que pivote no turismo familiar, no turismo verde e natural", asegurou Cubela.