Vilaboa pide a Educación que asuma os custes da limpeza e do mantemento do CPI do Toural
Por Redacción
O Concello de Vilaboa solicitou por escrito á Consellería de Educación que asuma os custes de limpeza e mantemento do Centro Público Integrado do Toural asumindo as competencias que se lle atribúen por lei e que ven soportando a administración local co conseguinte desgaste económico.
O Concello solicita que se asine un novo convenio no que Educación asume o custe laboral das dúas limpiadoras e un conserxe "ou ben que asuma directamente todo o servizo con persoal propio". De non alcanzar un acordo a administración local baralla deixar de asumir estas tarefas.
O alcalde de Vilaboa, César Poza confía en que as conversas con Educación den froito e este sexa o último ano no que o Concello teña que asumir estes custes nun centro no que é maioritario o alumnado de Educación Secundaria.
O Concello solicita tamén unha "compensación" por ter asumido estas tarefas durante todo este ano que ten valoradas en 81.291 euros correspondentes aos salarios do persoal de limpeza e conserxería e ao reforzo de limpeza e desinfección do centro educativo derivado da aplicación do protocolo preventivo da Covid-19 aprobado este ano.
Desta cantidade o Concello de Vilaboa recibiu, a través do convenio asinado coa Consellería e a Federación Galega de Municipios e Provincias, 22.922 euros; a mesma cantidade que en 2019 e que supón o 28% do custe total, derivando nas arcas municipais o 72% restante.
César Poza, alcalde de Vilaboa, recorda ademais que "o Concello non só está afrontando o mantemento senón tamén parte dos novos investimentos, necesarios para o correcto funcionamento das instalacións", e como exemplo pon o novo parque de Educación Infantil no centro educativo.
O Concello de Vilaboa recorda que no CPI do Toural están matriculados 325 alumnos dos que 20 cursan Infantil; 137 Primaria e 168 Secundaria, supoñendo o alumnado da ESO o 51,69% do total do centro.
Relacionadas:
-
A ANPA do CPI O Toural alerta do recorte de profesorado para este novo curso e anuncia protestas
Por Redacción |
-
A Xunta inviste 115.000 euros na substitución da carpintería exterior do CPI O Toural
Por Redacción |
-
'Que nos devolvan os profes', berro no CPI O Toural de cara ás protestas contra os recortes educativos
Por Redacción | Creada e actualizada
-
As escolas infantís de Vilaboa redobran a súa aposta por unha contorna natural na apertura do proceso de admisión
Por Redacción |
-
A Xunta aumenta o espazo educativo no colexio O Toural
Por Redacción |