Desmantelan unha organización que vendía fármacos sen receta desde Vilagarcía e Marín
Por Redacción
Unha operación conxunta da Garda Civil e da Policía Nacional logrou desmantelar unha organización criminal que se dedicaba á venda de fármacos sen receita e que operaba desde as localidades galegas de Vilagarcía de Arousa e Marín, Lorca (Murcia) e Córdoba.
Catro persoas foron detidas en Vilagarcía, Lorca e Córdoba no marco desta operación policial, denominada "Fleming-Botica", ás que se lles investiga polos delitos contra a saúde pública e falsidade documental.
Nos rexistros realizados nas catro localidades, os axentes incautaron múltiples fármacos, substancias estupefacientes, 30.000 euros en efectivo e equipos informáticos.
A investigación iniciouse tras unha denuncia anónima presentada a través da páxina web da Policía Nacional, na que unha persoa aseguraba que lle abordara unha muller que lle ofreceu a posibilidade de obter todo tipo de medicamentos de forma ilegal.
A modo de comercial de calquera empresa, a muller chegou mesmo a entregarlle unha tarxeta co teléfono de contacto por se no futuro tivese interese e explicoulle que o prezo dos medicamentos oscilaba entre os 50 e os 180 euros.
Unha segunda denuncia, presentada ante a Garda Civil de Baiona (Pontevedra), coincidía neste relato, aínda que neste caso a persoa aseguraba que comprara medicamentos a esta organización e, a pesar de pagalos, non os recibira xamais.
A investigación das forzas e corpos de seguridade do Estado permitiu atopar a páxina web desde a que esta muller ofrecía todo tipo de medicamentos de forma ilegal e sen receita, empregando un foro que compartía cos seus potenciais clientes.
Tras comprobalo coa Axencia Española do Medicamento, os axentes descubriron que os fármacos que esta muller vendía estaban suxeitos a prescrición médica e algúns deles eran mesmo substancias estupefacientes suxeitos á fiscalización internacional.
Entre as diferentes maneiras de facer provisión de medicamentos para vendelos a terceiros, a organización manipulaba dixitalmente receitas expedidas a nome dun dos seus membros, aproveitando un tratamento médico que estaba a seguir.
Esta persoa modificaba datas, nomes de facultativos e cambiaba continuamente de farmacia para levar a cabo a adquisición dos medicamentos
O outro colaborador identificado en Marín era a persoa que supostamente adquiría a través da Deep Web, o internet profundo, os medicamentos e outras substancias estupefacientes para que a muller os puidese comercializar.
A investigación revelou que os integrantes desta rede contaban cunha perfecta repartición de tarefas e que os seus beneficios económicos eran bastante cuantiosos.
Só os fármacos intervidos nos rexistros teñen un valor aproximado duns 60.000 euros, prezo ao que habería que sumar substancias estupefacientes como haxix e marihuana ou os 30.000 euros atopados en efectivo.