15 persoas sumáronse este domingo á primeira xornada de limpeza do río Gafos atendendo á chamada de Vaipolorío á cidadanía para participar nestas accións anuais que chegan ao seu 21 aniversario e nas que tamén colabora a Asociación Juan XXIII.

Nesta ocasión, segundo informa a asociación ecoloxista retiráronse 120 quilos de lixo, a metade da recollida hai un ano na primeira xornada. Destacan a presenza de máis de 40 quilos de residuos de vidro atopados no fondo do río. 

Desde Vaipolorío seguen facendo un chamamento á participación nestas tarefas de conservación do medio natural e positivas para a cidade durante todos os domingos de agosto. Lembran principalmente á xente máis nova a necesidade de apoiar estas propostas e mostrar o seu compromiso coa natureza.

Para apuntarse é necesario chamar antes dos venres ao teléfono 676.842.942 e levar botas altas e roupa axeitada para realizar a recollida do lixo.