Os sectores máis afectados pola covid en Barro xa poden solicitar axudas municipais
Por Redacción
A partir do venres de 6 de agosto os sectores afectados pola crise sanitaria da COVID-19 de Barro xa poden solicitar a través da Sede Electrónica unha axuda para mitigar os prexuizos económicos provocados pola pandemia e polos conseguintes peches obrigatorios de algúns establecementos e empresas.
O Goberno municipal destinou o 1% do orzamento para estas axudas, cun total de 25.000 euros, ao que se lle sumaron 10.700 euros da liña 2 do Plan Concellos 2021 da Deputación, acadando unha cifra total de 37.700 euros.
Poderán acceder a estas subvencións negocios de hostalaría e comercio, ximnasios e empresas de lecer e de cultura que carecesen de actividade por un período mínimo de dous meses entre o 14 de marzo do 2020 ata a actualidade e que teñan o seu establecemento en Barro.
A contía das axudas será de 600 euros por establecemento e de 1.000 euros no caso de persoas con máis dun local comercial. O prazo para solicitalas será de 20 días naturais a partir do día 6 de agosto e a tramitación será unicamente por vía electrónica.