Veciños de Campolongo reclaman o arranxo urxente das pistas deportivas
Por María José Pita
A asociación de veciños San José de Campolongo presentou un escrito ante o Concello de Pontevedra no que solicita ao goberno local que actúe de inmediato ante as graves deficiencias que presentan as pistas deportivas ao aire libre do barrio.
Juan Manuel Loureiro, o presidente da asociación veciñal, encabeza esta "denuncia-requirimento" na que se lembra que hai máis de 3 anos que se inciaron as obras na piscina municipal de Campolongo, unha mellora aplaudida nese momento por parte da asociación, xa que contemplaba o acondicionamento das pistas situadas na parte superior.
Unha vez rematada a obra nas instalacións deportivas, os veciños atópanse con que a zona exterior segue sen estar en condicións.
Entre outras carencias, destacan que nas pistas desembocan canos de recollida de pluviais, co perigo de acumulación de auga e deterioración do firme, ademais de risco de caídas polos charcos que se forman. O problema da auga esténdese á zona lindeira coas pistas, xa que a drenaxe da auga das mesmas vai dar a unha zona pública preto da parada de autobús da praza de Galicia.
Engaden outras deficiencias estruturais, como a falta de pintado das canchas que impide dividilas en zonas diferenciadas para a práctica de varios deportes, como estaba previsto.
Por estes motivos, solicitan ao Concello de Pontevedra que proceda a subsanar estes defectos e outras deficiencias na contorna, como pode ser o alumeado. Ademais do pintado, piden que se dote ás canchas de porterías, canastras e demais elementos para a práctica deportiva, tal e como foron proxectadas.
RESPOSTA DO CONCELLO
En comunicación co concelleiro de Deportes, Tino Fernández, este confima que o arranxo das pistas de Campolongo está na axenda de actuacións municipais. O retraso nesta obra débese a que a responsabilidade do acondicionamento deste espazo deportivo depende da empresa concesionaria da piscina e instalacións deportivas de Campolongo, BeOne - Serviocio.
Fernández informa de que a Concellería de Deportes xa aprobou unha intervención valorada en 5.000 euros para marcar, pintar e acondicionar a zona das pistas deportivas máis achegadas ao centro educativo para que poidan ser utilizadas como espazo de recreo e deportivo por parte do alumnado do colexio de Campolongo.
En canto ao resto das pistas, corresponde neste momento á empresa que xestiona as instalacións deportivas de Campolongo executar as obras necesarias para acondicionalas e pintalas. O edil de Deportes sinala que a actuación da empresa estase atrasando porque desde a súa concellería detectouse que a cuberta non está rematada do xeito debido e que, en canto chove, acumúlase a auga en varios puntos.
Neste momento, o Concello de Pontevedra está negociando coa empresa concesionaria para que antes de pintar ou acondicionar as pistas repare as fochancas do terreo. O concelleiro Tino Fernández confía en que ao longo deste mes de setembro se poida solucionar o problema de acumulación de auga, e xa co solo das pistas igualado a empresa proceda ao pintado, ao marcaxe das diferentes áreas deportivas e ao seu remate final.
Relacionadas:
-
Campolongo recupera a súa cancha de baloncesto
Por Redacción |
-
As pistas de Campolongo recuperan as súas porterías
Por Redacción |
-
Os veciños arrancan ao Concello o compromiso de arranxar unha serie de "deficiencias" no parque de Campolongo
Por Oskar Viéitez |
-
A pista polideportiva do CEIP Manuel Vidal Portela contará con cortinas de illamento
Por Redacción |
-
O concelleiro de Obras Urbanas destaca que "o nivel de esixencia que temos os veciños de Pontevedra é moi elevado"
Por Oskar Viéitez |
-
Denuncian falta de luz e mal estado das beirarrúas en Campolongo: "pones mal el bastón y te vas al suelo"
Por Almu Dapena & Mónica Patxot |