Eliminado un punto de vertido de augas residuais ao río Gafos en Salcedo
Por Redacción
Eliminado un punto de vertido de augas residuais na parroquia pontevedresa de Salcedo.
Os técnicos do Plan de Control de Vertidos, dependente de Augas de Galicia, iniciaron as inspeccións tras a recepción dun aviso procedente do 112.
Os inspectores desprazáronse ao lugar da Cancela, identificando a orixe do foco na rede de saneamento que discorre pola beira dereita do leito do río Gafos. O vertido infiltrábase a través do terreo por onde vai soterrada a infraestrutura de saneamento, verificando os técnicos de Augas de Galicia a súa orixe mediante o emprego de trazador hidrosoluble.
Os técnicos da Xunta comunicaron a incidencia ao Concello de Pontevedra para que levase a cabo as actuacións correctoras precisas.
Nunha nova inspección xirada á zona, os inspectores de Augas de Galicia verificaron que o Concello executou melloras no pozo de rexistro da rede de saneamento onde se orixinaba a filtración, cesando deste xeito os vertidos contaminantes cara ao Dominio Público Hidráulico.