Retornan as sesións da Facultade Ágora coa directora de Saúde Pública da OMS
Por Redacción
A Facultade Ágora, a iniciativa formativa da Deputación de Pontevedra para persoal político e técnico da provincia enfocada na mellora do espazo público e o aumento da calidade de vida das persoas, vai retomar este venres 17 a súa actividade logo do parón do verán para falar da relación entre espazos públicos, saúde e biodiversidade.
O plantel de profesores e profesoras para esta xornada está formado por profesionais de prestixio e vén encabezado pola médica María Purificación Neira, que dirixe o departamento de Saúde Pública e Medio Ambiente da Organización Mundial da Saúde (OMS), e que nestes momentos está na primeira liña mediática pola pandemia da COVID.
O principal obxectivo da xornada, á que asistirán de maneira mixta, presencial e por zoom, as máis de 200 persoas apuntadas, pretende estudar a relación entre a humanización do espazo público e a mellora da saúde e a biodiversidade, complementando as exposicións cun repaso práctico de experiencias locais. Entre outras, porase sobre a mesa temas como a importancia dos novos modelos urbanos, xa interiorizados por gobernantes e poboación, que buscan reducir o impacto do tráfico motorizado e a contaminación ambiental. De maneira concreta abordarase como a polución está a afectar á cidadanía, a prevalencia de determinadas enfermidades relacionadas co modelo de vida aínda imperante, e o feito de que as persoas máis vulnerables son as que máis sofren as consecuencias.
"Antes do verán fixemos seis seminarios englobados en dous bloques, sobre o ‘Bo urbanismo’ e a ‘Boa mobilidade’, e agora iniciamos un novo bloque temático ‘O medio habitable’, no que queremos disertar e dar unha visión plural sobre o espazo público falando da saúde e a biodiversidade", sinala o Uxío Benítez, deputado de Mobilidade Alternativa e Espazos Públicos, departamento que impulsa o proxecto da Facultade Ágora .
Ademais da doutora María Purificación Neira, directora do Departamento de Saúde Pública e do Ambiente da OMS, participará na sesión do venres o biólogo e experto verde urbano Josep Selga, que disertará sobre a importancia do "verde" como un recurso para facer cidades máis atractivas e habitables; o neumólogo do Complexo Hospitalario Universitario de Pontevedra (CHUP) Adolfo Baloira, que incidirá nas afeccións sufridas pola cidadanía debido á contaminación; e a arquitecta e ex directora da Escola Galega da Paisaxe Isabel Aguirre de Úrcola, que achegará a súa experiencia en rehabilitacións paisaxísticas na Illa do Cobo de Pontevedra, o parque santiagués de Bonaval, co arquitecto Álvaro Siza, ou diversos parques en Lisboa.
Relacionadas:
-
Uxío Benítez reivindica o espazo público como elemento de cohesión social
Por Redacción |
-
A Facultade Ágora abordará o xogo libre da infancia no espazo público como indicador de calidade nas cidades
Por Redacción |
-
Uxío Benítez traslada a un foro na Coruña a 'Fórmula Ágora' para fomentar o espazo público
Por Redacción |
-
A Facultade Ágora reflexiona sobre o ‘Hábitat saudable e biodiverso’
Por Redacción |
-
A Facultade Ágora acolle un último seminario sobre "Mobilidades alternativas" antes do parón do verán
Por Oskar Viéitez |
-
A Facultade Ágora analiza a redución do tráfico de paso e de transporte de mercadorías
Por Redacción |
-
Cuarta sesión da Facultade Ágora co recoñecemento dos peóns como base das cidades sustentables
Por Redacción |
-
A Facultade Ágora reflexionará sobre ‘As persoas primeiro’
Por Redacción |
-
A Facultade Ágora reflexiona sobre as cidades que coidan as persoas e limitan os vehículos
Por Redacción |