O aroma a lúpulo xa invade Pontevedra
Por Redacción
Os amantes da cervexa teñen unha parada obrigada en Pontevedra esta fin de semana. Na emblemática Praza da Ferrería inaugurouse na tarde deste xoves a segunda edición de Pontebirra, a feira da cervexa artesá que reúne este ano a máis dunha trintena de produtores que ofrecen ahsta setenta tipos de cervexas diferentes.
O goteo de curiosos e apaixonados desta bebida foi constante desde a apertura da feira. Produtores chegados da propia capital e dos seus arredores, de Vigo, Lugo, A Coruña, Lugo, Madrid ou Toledo ofrecen desde media tarde as súas particulares producións. En forma de U, deixando o centro da praza para a degustación das cervexas, os clientes percorren cada uns dos postos para probalas e informarse sobre a súa elaboración.
Aínda que xa se serven desde este xoves, a feira permanecerá aberta ao público ata o domingo. E non só para degustar cervexas, a oferta complétase con foodtrucks e zona de xogos infantís.