Rouban varios colectores de lixo en Portas
Por Redacción
O Concello de Portas denuncia que varios contedores de lixo recén incorporados ao sistema de recollida de residuos sólidos urbanos foron subtraídos nos últimos días o que está a supoñer ademais dun prexuízo económico para o municipio, un problema importante para o servizo de recollida.
Este incidente foi posto en coñecemento da Garda Civil que iniciará as investigacións pertinentes para identificar aos autores da subtracción para que devolvan os contedores e sexan obxecto das medidas sancionadoras ás que haxa lugar.
O Concello de Portas expresa a súa máxima repulsa sobre esta práctica que nos últimos tempos se está a facer demasiado habitual e está a ocasionar graves prexuízos para os servizos municipiais que recibe a veciñanza e solicita a colaboración cidadá para dar cos autores do roubo.
A Deputación de Pontevedra, concedeu ao Concello de Portas, unha subvención de 12.800 euros a través do Plan Concellos 2018-2019, para a adquisición de colectores de lixo. Este importe, é o resultante da aplicación das baixas doutros investimentos. En total, foron 75 unidades que se colocaron, na súa maioría nas parroquias de Briallos e Lantaño, lugares de onde desapareceron nos últimos días e que motivaron a denuncia.