Comerciantes, veciños e hostaleiros "víronse prexudicados" pola celebración de Pontebirra, asegura Zona Monumental
Por Diego Espiño
A celebración da feira da cervexa artesá Pontebirra converteuse nun gran polo de atracción para os pontevedreses durante a fin de semana, con momentos nos que se rozou o máximo aforo permitido.
Con todo o seu éxito de asistencia motivou este luns un escrito de queixa do Centro Comercial Urbano (CCU) Zona Monumental en representación de comerciantes e hostaleiros do centro histórico.
"Queremos manifestar o noso total apoio á feira da cervexa artesá Pontebirra, a condición de que fose realmente unha feira de cervexa artesá, pero como non foi así, queremos comunicar á Corporación Municipal os seguintes matices", explica a asociación.
Entre eses matices atópase en primeiro lugar a presenza de 'foodtrucks' de comida realizando labores de restauración prexudicando á hostalería da zona. "No canto de tentar atraer o publico cara aos seus locais, promociónase un evento, de xeito evidente hostaleiro, no centro da Ferrería", defende o CCU.
"Non foi consensuado, nin con veciños, comerciantes e hostaleiros que se viron prexudicados por este evento", denuncian no comunicado, co agravante de tratarse dun evento que a diferenza doutros similares realizados na cidade onde o fin é recadatorio para clubs deportivos, contaba cun beneficiario privado e "en toda a feira non había presenza de ningún empresario da cidade".
Zona Monumental asegura ademais que a ocupación da praza impedía unha fluída circulación cara aos locais da rúa San Román, e que o horario de apertura ata a 1.00 da madrugada contrasta coa obrigación por exemplo aos ocupantes da primeira planta do Mercado de pechar ás 23.00 horas.
Por último critican que "en ningún momento controlouse o aforo ao recinto", máis aló de solicitar un nome e un número de teléfono á entrada.
Relacionadas:
-
Estudantes de Dirección e Xestión Pública propoñen unha "auditoría social" para reforzar a Zona Monumental
Por Redacción |
-
Pontebirra desborda as expectativas rozando o seu aforo máximo
Por Redacción & Cristina Saiz |
-
O aroma a lúpulo xa invade Pontevedra
Por Redacción |
-
A cervexa artesá degústase na Ferrería
Por Manu Otero |