Ernesto Caballero estrea unha nova horta urbana con dezanove bancais
Por Redacción
Dezanove áreas de cultivo individuais, dúas máis das previstas inicialmente, integran a nova horta urbana habilitada na rúa Ernesto Caballero.
Todos os espazos están xa asignados e os adxudicatarios da explotación das parcelas, acondicionadas pola empresa de inserción laboral Feito Pontevedra, xa dispoñen das chaves para comezar a traballar nelas. Hai outras doce persoas en lista de agarda.
A nova horta urbana, situada entre Ernesto Caballero e as vías do ferrocarril, supuxo un investimento de máis de 30.000 euros, que permitiu instalar bancais de 14 metros cadrados, dispostos con achegas de terra vexetal e compost.
O proxecto incluíu a colocación dun peche perimetral de dous metros de altura cun portón de acceso pechado con chave para o que só os usuarios dispoñen de acceso, unha billa e un sistema automatizado de rego por goteo cun programador.
Dado que a finca carecía de auga, os traballos tamén contemplaron a execución dunha acometida desde a rúa Ernesto Caballero por parte da concesionaria Viaqua.
As obras incluíron a achega de material para acadar un solo o máis plano posible, a adecuación de zonas comúns e de paso mediante un aporte de zahorra e a compactación do pavimento, a subministración de ferramentas de uso agrícola para o emprego comunitario dos usuarios e a colocación dunha caseta para gardar o material de traballo.
A horta conta ademais cun composteiro para o tratamento dos residuos agrícolas, o que permite completar o ciclo da materia orgánica dentro da propia finca.
Ata o verxel comunitario acudiron este xoves o tenente de alcalde, Tino Fernández; o concelleiro de Desenvolvemento Sostible, Iván Puentes, e a edil de Promoción Económica, Yoya Blanco, para supervisar o resultado das obras de acondicionamento.
Esta nova horta urbana súmase ás existentes en Conde de Bugallal, que ten 37 bancadas; e en Monte Porreiro, que conta con 22 postos de cultivo.