Condenado un guardiamarina a catro anos de prisión por gravar a alumnas con cámaras ocultas na Escola Naval
Por Oskar Viéitez
O Xulgado Togado Militar Territorial nº 41, con sede na Coruña, condenou a catro anos de prisión a un guardiamarina e alumno de 4º curso da Escola Naval Militar de Marín por colocar cámaras ocultas e gravar a alumnas nas camaretas destas instalacións.
Así mesmo, deberá indemnizar ás afectadas por un global de 40.500 euros, e non poderá achegarse a elas durante dez anos.
Este guardiamarina foi condenado como autor de oito delitos de abuso de autoridade na súa modalidade de atentado grave á intimidade, e trece relativos ao exercicio dos dereitos fundamentais e das liberdades públicas polos militares.
Desde finais do ano 2018, cando se atopaba en segundo curso, o acusado gravou a diversas alumnas do centro sen o seu consentimento servíndose dunha minicámara tanto nas súas camaretas como nas duchas, captando imaxes en roupa interior, cambiándose de roupa e totalmente espidas.
O tribunal considera que a conduta do procesado representa "un acto gravemente atentatorio á súa intimidade".