Concedida a licenza para executar a derriba dun tramo das Galerías Oliva
Por Oskar Viéitez
A Xunta de Goberno do Concello de Pontevedra concedeu á empresa Hercor Inversiones a licenza de demolición para o inmoble número 3 da rúa Gutiérrez Mellado, que inclúe o acceso desde este vial ás Galerías da Oliva.
Segundo informou en rolda de prensa a portavoz do goberno local, Anabel Gulías, a concesión desta licenza municipal é un proceso regrado "e pouco, lamentablemente, pode facer o Concello para evitar esta obra" comentou a concelleira.
"Estes procesos teñen moitísimo de técnico e moi pouco de discrecional", engadiu. A licenza pasou todos os trámites preceptivos e conta cos informes sectoriais necesarios.
Unha vez que se tomou este acordo por parte do Concello agora notificarase aos interesados e establécense os prazos habituais para a demolición que son de seis meses desde a comunicación do acto administrativo cunha interrupción máxima doutros seis meses.
É dicir, segundo a normativa, este proceso tería unha duración máxima de 12 meses desde a notificación.
Anabel Gulías asegurou que "o Concello non ten ningún coñecemento da obra posterior, da intencionalidade nin demais".
Neste caso a licenza afecta a un edificio, pero esta promotora solicitou un permiso similar para un inmoble lindeiro, o situado no número 11 da rúa Michelena que, segundo detallou Anabel Gulías, está pendente do pronunciamento de Patrimonio da Consellería de Cultura xa que a fachada cara a esa rúa está afectada polo ámbito protexido pola declaración do santuario da Peregrina como Ben de interese Cultural (BIC).
"Non temos ningunha información sobre o que vai ocorrer co futuro dos edificios nin coas Galerías. É un tema que nos preocupa e nos inquieta porque as Galerías son un emblema da cidade", dixo a portavoz do goberno local.
O plan de urbanismo permite aos propietarios o aproveitamento do inmoble para uso residencial, de oficinas ou equipamentos sen que teñan obrigación de manter as galerías actuais xa que non están previstas no planeamento.
Relacionadas:
-
A un paso de demolerse un tramo das Galerías Oliva
Por Redacción |
-
Patrimonio non autoriza a demolición do edificio de Michelena lindeiro coas Galerías da Oliva
Por Alejandro Espiño |
-
O Concello non poderá salvar as Galerías da Oliva da súa demolición parcial
Por Alejandro Espiño |
-
Desolación nas Galerías da Oliva: "Sabíamos que algo había pero non nos contaron a verdade da situación"
Por Manu Otero |
-
Proxectan demoler parte das Galerías Oliva e dous edificios en Gutiérrez Mellado e Michelena
Por Alejandro Espiño & Mónica Patxot |