Deteñen un veciño de Poio de 36 anos con dúas ordes de busca
Por Redacción
Durante a mañá do martes 19 deste mes, axentes da Policía Local de Poio identificaban un home "habitual coñecido" das forzas de seguridade, que arrastraba dúas ordes de procura, detención e comparecencia en dous xulgados de Pontevedra.
O home de 36 anos, veciño do municipio, atopábase na parroquia de Combarro cando foi detido. Conta con antecedentes por delitos sobre substancias nocivas para a saúde en relación a prácticas de furtivismo na ría, violencia de xénero, desobediencia e resistencia a axentes da autoridade.
Os axentes solicitaron os antecedentes penais, unha vez que se procedía á identificación, e comprobaban que tiña na actualidade esas dúas ordes de procura. Por este motivo, foi trasladado para pasar a disposición xudicial durante esa mesma xornada.
O home conta cunha inhabilitación especial de dous anos de duración para o exercicio de actividades relacionadas co marisqueo. Entre o seu historial, este veciño de Poio foi investigado en decembro de 2019 e en agosto de 2020 por delitos contra a Flora e a Fauna por esas prácticas de marisqueo furtivo, ao extraer ameixas e vendelas de forma ilegal a outras persoas do municipio.
En 2020 tamén foi investigado por un delito de ameazas graves contra axentes da autoridade e xa en agosto deste mesmo ano tamén era obxecto doutra investigación por delito de desobediencia e ameazas graves a axentes da autoridade. Algunhas das causas que recaen sobre el aínda se atopan pendentes de xuízo.
Relacionadas:
-
Dous veciños de Poio, sorprendidos "in fraganti" cando practicaban furtivismo e foxen nadando
Por Anxo Lourido |
-
Detido un pontevedrés por incumprir a orde de afastamento da súa parella
Por Oskar Viéitez |
-
A Policía Autonómica decomisa 75 quilos de ameixa nunha operación contra o furtivismo en Poio
Por Redacción |
-
Dous furtivos sorprendidos cando vendían ameixa ilegal nun negocio de Poio reaccionan ameazando aos policías
Por Redacción |
-
Identifican dous furtivos reincidentes con case 20 quilos de ameixa extraída ilegalmente na praia da Ostreira
Por Redacción |