A Facultade Ágora pon o foco en adaptar os espazos urbanos ás persoas máis vulnerables
Por Redacción
A Facultade Ágora, a iniciativa formativa da Deputación para representantes políticas e técnicas dos concellos da provincia, abordou este xoves a ‘Inclusión Social’ no espazo público chegando á conclusión de que no deseño urbano sempre se debe asumir a perspectiva das persoas máis vulnerables e con menos recursos.
As persoas especialistas que participaron no seminario, a urbanista Zaida Muxí, o xeógrafo Màrius Navazo e os representantes de Cogami Anxo Queiruga e Paulo Fontán, coincidiron en que é preciso pensar as cidades de maneira global para que todo o mundo se atope cómodo en todos os seus espazos.
A doutora Zaida Muxí foi a primeira en falar na xornada. Admitiu que o urbanismo non é neutral nin universal “posto que ignora a diversidade” e subliñou que é preciso traballar na mellora da accesibilidade e a inclusión, pero tendo en conta a vida cotiá -os espazos de encontro, de xogo, da vida...- e non só unicamente os espazos excepcionais onde hai monumentos, como acontece en moitas cidades.
Anxo Queiruga seguiu na liña de afirmar que a inclusión social é unha cuestión de empatía. Lembrou que a pandemia amosou a fraxilidade de todas e todas e instou a reflexionar sobre as persoas vulnerables que non poden saír da casa ao longo da súa vida polos problemas de deseño urbano.
Paulo Fontán, pola súa banda, fixo un chamamento a responsables técnicos e políticos para preguntar como abordar melloras urbanas ás persoas que máis dificultades teñen para a vida no espazo público.
Finalmente, Màrius Navazo afondou na idea de que a reflexión sobre a inclusión social o que debe é poñer sobre a mesa o papel dos coches nas vilas e cidades. Asegurou que as administracións “non deben cumprir coa accesibilidade só nas migallas que deixa o coche, senón todo o contrario, aproveitar a reflexión da inclusión social para reclamar o pan enteiro –todo o espazo público- para as persoas”.
Para pechar o seminario, o deputado Uxío Benítez insistiu en que a Facultade Ágora vén desde o inicio cuestionando permanentemente o papel do coche na sociedade. Subliñou que as cidades foron pensadas no século XX para o coche por un perfil minoritario “de home varón con vehículo a motor” e insistiu que “no século XXI é o momento de darlle a volta e crear espazos para as persoas".
Relacionadas:
-
Regresa a Facultade Ágora coa intención de se converter no Laboratorio I+D+i do espazo público
Por Mónica Patxot & Anxo Lourido |
-
Un libro recollerá as conclusións e relatorios da Facultade Ágora para mellorar o espazo público
Por Oskar Viéitez |
-
María Ángeles Durán: "El mayor éxito de la humanidad en los últimos años es llegar a ser una sociedad de viejos"
Por Redacción |
-
Jan Gehl impartirá a súa conferencia maxistral en Pontevedra no acto de clausura da Facultade Ágora
Por Redacción |
-
A primeira Asemblea Ágora recolle unha batería de iniciativas para recuperar máis espazo público para as persoas
Por Redacción |
-
O prestixioso arquitecto Jan Gehl dará o último seminario da Facultade Ágora
Por Oskar Viéitez |
-
Os coches eléctricos xa se poden cargar no campus universitario
Por Redacción |