Xornada de concentracións en defensa da sanidade pública e das limpadoras da sede de Tráfico
Por Redacción
A contorna do ambulatorio Virxe Peregrina e da Subdelegación do Goberno foron escenario este venres de senllas concentracións promovidas polo sindicato Comisións Obreiras en defensa dunha Atención Primaria presencial e con máis medios, así como dunha protesta contra a falta de pagamentos que sofren as traballadoras da limpeza da sede de Tráfico en Pontevedra.
"Defendemos unha atención primaria de máis calidade, universal e accesible para os maiores", reclama Mercedes Márquez, secretaria de organizacion da sección de pensionistas e xubilados da comarca de Pontevedra de CC.OO. "Temos un problema derivado da pandemia que é que se suprimiron probas e revisións", protesta en contra da xeneralización do sistema telefónica e da falta de citas presenciais.
"Atopamos inconvenientes para acudir ao médico e solucionar os nosos problemas, queremos que a atención sexa presencial", esixen desde o sindicato pedindo un incremento do orzamento da sanidade pública do 25 % ao longo do próximos cinco anos.
Unha hora máis tarde, fronte á Subdelegación, tivo lugar outra protesta contra a empresa Yaunde, adxudicataria do contrato de limpeza da sede de Tráfico da Garda Civil da DXT en Galicia, Asturias e Cantabria.
Denuncian desde o sindicato, que a empresa leva meses acumulando atrasos no pago das nóminas e lonxe de solucionar o problema, as traballadoras viron como empeoraba ao non percibir o seu salario do mes de setembro e, a dous días para concluír outubro, tampouco cobraron esta mensualidade.
"Buscaremos que lle quiten a adxudicación ou lle abran un expediente para adjudicarsela a outra empresa aínda que sexa provisional", propón Isaac Gutierrez, secretario xeral da Federación de Servizos de Pontevedra de CC. OO.
Alerta o sindicalista que se o conflito non se resolve pronto "podémonos atopar cunha situación moi complicada". Para resolvelo compaxinarán concentracións como a deste venres con contactos coa adxudicataria como coa DXT para que estuden o caso con urxencia, abran expediente á empresa e busquen solucións. "Non vale todo en contratación pública, hai que garantir os dereitos dos traballadores", esixen desde Comisións.
Relacionadas:
-
Protesta tras dous meses limpando sen cobrar as oficinas de Tráfico da Garda Civil
Por María José Pita |
-
CCOO pide solucións á Universidade de Vigo para o persoal de ximnasio do campus
Por Redacción |
-
Comisións Obreiras culpa ao "afán privatizador" de Telmo Martín da ausencia de socorristas en Sanxenxo
Por Oskar Viéitez |
-
Santa María vai quedando baleiro de pacientes antes do seu peche definitivo
Por Alejandro Espiño & Mónica Patxot |
-
Contratos de escasa duración e precariedade laboral, o "engano" que atopan os sindicatos detrás do descenso do paro
Por Redacción |