Unha senda peonil resolverá os problemas de seguridade viaria na contorna da igrexa de Figueirido
Por Redacción
Unha senda peonil de 636 metros de lonxitude rematará cos problemas de seguridade viaria no ramal de acceso á igrexa de Figueirido, en Vilaboa.
A estrada EP-0104, de titularidade da Deputación de Pontevedra, ten dobre sentido de circulación e polo de agora carece de beirarrúas. Tras varias conversas mantidas polo alcalde de Vilaboa, César Poza, cos responsables de Infraestruturas e de Mobilidade do ente provincial acordouse como solución máis favorable para a mellora da seguridade viaria neste tramo a construcción dunha senda de formigón coloreado que protexa aos viandantes dos riscos do tráfico rodado.
A actuación, que supera o medio millón de euros de investimento, será asumida na súa totalidade pola Deputación de Pontevedra a través dun convenio co Concello, que lle cederá os terreos necesarios para acometer os traballos.
Ademais das obras de pavimentación e construcción da senda, a actuación inclúe un sistema de drenaxe de augas pluviais e a reposición de aqueles servicios afectados pola execución das obras.
Esta serie de actuacións teñen por obxecto mellorar as características da estrada en beneficio da seguridade e comodidade dos usuarios, como son a mellora das actuais paradas de bus mediante a disposición dun espazo reservado para tal fin fóra da calzada. Rehabilitarase tamén o firme nos tramos máis danados, delimitarase o espazo de plataforma de estrada que actualmente presenta anchos de carrís dispares, disporanse pasos de peóns sobreelevados e dotarase dun treito de calmado de velocidade nas inmediacións do cemiterio de Santo André de Figueirido, onde se deseña unha zona de convivencia e unha praza con prioridade peonil.