O PP de Pontevedra rexistra unha emenda á totalidade aos orzamentos do Concello
Por Oskar Viéitez
O PP de Pontevedra rexistrou este xoves a emenda á totalidade aos orzamentos do Concello para o ano 2022.
Tras a análise das contas, o portavoz do grupo municipal do PP de Pontevedra, Rafa Domínguez, indicou que se trata dun documento "afastado da realidade".
Domínguez fixo referencia á Memoria da Alcaldía, onde se fala dunha traxectoria ascendente dos datos económicos da cidade.
"Pontevedra é a cidade coa taxa de paro máis elevado das sete cidades galegas, cunha enorme cantidade de baixos baleiros en pleno centro e desde a mesma alcaldía téntase pechar a empresa que máis PIB achega. O alcalde debería recoñecer mellor a realidade da nosa cidade", dixo Domínguez.
En relación co documento, o popular subliña que se trata dunhas contas que presentan un "investimento moi baixo, que abandona ao rural e os barrios, que se esquecen das instalacións deportivas".
No ámbito cultural, "non figura nin unha soa obra fundamental para este sector, así como ningunha acción que poida mellorar a oferta cultural". Sobre o nivel de carga impositiva que recae sobre a sociedade apuntou que "son uns orzamentos que recollen unhas taxas e impostos excesivos para os pontevedreses".
A Domínguez chamoulle "poderosamente a atención que en ningún lado figure o famoso millón de euros prometido a Monte Porreiro" xa que "parece un castigo en contra dos veciños, cada día máis, que alzan a voz en contra dalgunha acción do goberno local. É unha falta de respecto aos cidadáns dun barrio que leva abandonado tantos anos".
Relacionadas:
-
O PP debulla a súa emenda á totalidade aos Orzamentos 2022 mentres o Goberno local critica a súa "incapacidade"
Por Natalia Puga |
-
Pontevedra aprobará o 7 de xaneiro o seu orzamento municipal para 2022
Por Alejandro Espiño |
-
Pontevedra presenta un orzamento de case 86 millóns de euros para 2022
Por Oskar Viéitez & Mónica Patxot |