A Placemaking Week buscará solucións para Monte Porreiro e outras dúas áreas locais no seu congreso de setembro
Por Alejandro Espiño
Mellorar a calidade de vida no barrio de Monte Porreiro será un dos asuntos locais que se tratarán na Placemaking Week Europe, o congreso que reunirá o próximo mes de setembro en Pontevedra a expertos nacionais e internacionais en urbanismo sustentable.
Así o adiantou a portavoz do goberno municipal, Anabel Gulías, que explicou que o congreso abordará propostas pensadas para aumentar a calidade de vida neste barrio. Haberá ademais outros dous temas locais aínda por definir.
A organización do evento prevé fixar este martes a temática global desta cita que, segundo explicou a edil de Promoción da cidade, abordará "previsiblemente" cuestións ambientais.
"Hai perfecta sintonía para que sexa entorno a como dende as cidades temos capacidade e responsabilidade para mudar as nosas realidades e lograr cidades máis amábeis e máis sustentables, en definitiva, máis xustas", subliñou Gulías en rolda de prensa.
A deste martes será unha xuntanza telemática, se ben a concelleira non descarta a realización dunha reunión, nun breve prazo de tempo, na propia cidade de Pontevedra.
Entre os membros da xunta directiva do congreso, recordou Anabel Gulías, aparecen nomes de diversos países, vinculados a consultoras, entidades sociais ou organizacións políticas.
De tal xeito, está conformado hoxe en día polo vicealcalde de Estocolmo, Fredrik Lindstål; o economista Ramón Marrades, director da rede Placemaking Europe; o comunicador holandés Jeroen Laven; o urbanista e sociólogo húngaro Levente Polyak; a xeógrafa grega Vivian Doumpa, a activista danesa Laska Nenova e o urbanista holandés Ronald Huikeshoven.