O transporte a demanda será o "coche de punto" e iniciará as súas probas o 31 de xaneiro
Por Alejandro Espiño
Pontevedra recuperará o "coche de punto", unha tradición que " aínda estaba viva" na memoria dos pontevedreses. Era un servizo paralelo ao coñecido como "coche de liña" e servía para desprazarse a un lugar en concreto e recoller aos seus viaxeiros.
Por iso, o Concello entende que "non había opción mellor" para bautizar o transporte a demanda da cidade que, se se cumpren as previsións, estará operativo a finais de ano, segundo explicou o edil de Mobilidade, Demetrio Gómez.
"Soa ben, recuperamos unha tradición e creamos unha marca que se entende e queda moi elegante", sostivo o responsable municipal.
Será, en todo caso, para persoas que queiran desprazarse do rural á cidade -non se permitirá viaxar entre parroquias- e poderán compartilo varias persoas, sempre que vivan en zonas próximas porque os seus domicilios serán sempre o punto de partida.
O "coche de punto" entrará en fase de probas o próximo 31 de xaneiro. Durante un mes, vinte usuarios de catro parroquias, Marcón, Salcedo, Tomeza e Ponte Sampaio, probarán todo o sistema para corrixir posibles defectos na plataforma que se creou.
A idea, segundo Demetrio Gómez, é que "non lle imos explicar a ninguén" como darse de alta na plataforma ou como solicitar unha viaxe "para ver se é accesible e intuitivo" ou se teñen que facer certas correccións para que a interacción do usuario sexa máis sinxela.
Os viaxeiros nesta fase de probas serán seleccionados polo Concello, en colaboración cos consellos parroquiais. Poderán descargarse a APP nos seus móbiles ou solicitar viaxes na páxina web ou na central de reservas que, por agora, será a de Radio Taxi.
Haberá dez taxistas que prestarán este servizo -con vehículos de ata 9 prazas- durante este primeiro mes. Serán viaxes gratuítas para os usuarios e que se poderán facer entre as 07:00 e as 14:30 horas. Deberán solicitalos o día anterior e recibirán unha confirmación telefónica.
Durante estas probas, as viaxes realizaranse entre os domicilios das persoas seleccionadas e puntos determinados da cidade que, por agora, serán a Praza de Galicia, o centro de saúde da Alameda, a Casa do Mar, o Hospital Provincial, a delegación da Xunta en Campolongo, o campus universitario, as estacións de bus e tren e a praza de abastos.
Fóra do ámbito urbano, só se permitirán viaxes ata Montecelo, aínda que cando estea totalmente operativo tamén se incorporará o centro de saúde de Lérez.
"Estamos realmente moi ilusionados porque non existe en ningún sitio un sistema como este", destacou o concelleiro nacionalista.
Relacionadas:
-
Soutomaior apúntase ao 'transporte a demanda' para trasladar a colectivos vulnerables ao médico e xestións públicas
Por Redacción |
-
O coche de punto poñerase en marcha antes da primavera do 2023
Por Raquel Currás Martínez |
-
Autorización da Xunta para que se desenvolva o 'coche de punto' a través do servizo de taxi
Por Redacción |
-
As probas do 'coche de punto' ábrense a todo o rural tras "superar todas as expectativas"
Por Alejandro Espiño |
-
Pontevedra xa proba o 'coche de punto' para poder "pulir" todo o sistema
Por Alejandro Espiño & Mónica Patxot |
-
As probas do novo Coche de Punto trasládanse a todas as parroquias
Por Redacción |
-
O Coche de Punto comeza a súa fase de probas resolvendo as primeiras incidencias detectadas
Por Redacción |
-
A veciñanza de Tomeza, Marcón, Salcedo e Ponte Sampaio participará nas probas do 'Coche de punto'
Por Redacción |
-
Enquisas na primeira quincena de xuño para coñecer hábitos de mobilidade e perfilar o transporte a demanda
Por Anxo Lourido |
-
Primeiros pasos da plataforma que xestionará o transporte a demanda en Pontevedra
Por Alejandro Espiño |
-
A plataforma de transporte compartido a demanda funcionará a finais de 2022 para dar servizo ao rural
Por Redacción |