Os veciños de Campolongo piden o inicio da obra de descuberta do tramo urbano do Gafos neste mandato
Por Anxo Lourido
Representantes da Asociación veciñal San José de Campolongo, co presidente Juan Manuel Loureiro á cabeza, reuníanse este martes na zona de Xeneral Rubín co concelleiro Iván Puentes, responsable de Desenvolvemento Sostible e Medio Natural.
Alí, os veciños demandaron que antes da finalización deste mandato haxa algún movemento no gran proxecto de apertura do río dos Gafos no seu tramo urbano. Afirman que a gran maioría de residentes na zona apoian esta iniciativa e esixen "algo máis que palabras" durante os próximos meses.
Iván Puentes explicou que esta "gran obra" de apertura do río entre Xeneral Rubín e Alcalde Hevia permanece pendente da finalización do prego a cargo do Colexio de Arquitectos de Galicia.
"Está nos últimos coletazos", indicou o concelleiro e o seguinte paso sería a convocatoria do concurso. Paralelamente, o Concello mantense á espera de coñecer se se aproban as axudas solicitadas a través da Fundación Biodiversidade á Unión Europea de fondos Next Generation para financiar o proxecto.
En abril coñecerase se se aproba esa solicitude de dous millóns de euros para abordar o primeiro tramo entre Xeneral Rubín e a praza de Campolongo. Antes do verán coñecerase tamén se se concede a axuda, por unha cantidade similar, para o segundo tramo entre a praza de Campolongo e Alcalde Hevia.
En caso de non lograr esta vía de financiamento, o concelleiro indicou que se buscarían outras alternativas. En todo caso, os fondos europeos estenderíanse ao longo de varios anos ata 2025 para afrontar a obra en varias fases.
Puentes tamén anunciou o inicio dos traballos de naturalización do río dos Gafos entre Rosalía de Castro e Xeneral Rubín, na zona da Tablada. Estes traballos contan cun investimento de 600.000 euros, procedentes de fondos Edusi.
O concelleiro recoñeceu que a zona se atopa en "situación de deterioro" e o proxecto céntrase en crear senllas para dar actividade a esta zona e avanzar esa idea de río urbano en conexión coa cidade. O proxecto entra esta semana no servizo de contratación e, no prazo de 15 días, levará a aprobación á Xunta de Goberno do Concello para licitarse e comezar no menor tempo posible, segundo explicou.
Tamén engadiu que se realizará unha segunda actuación provisional ata o parque infantil de Campolongo no antigo paseo de Valle Inclán, unha zona que se atopa pechada por razóns de seguridade
A intención é conectar Iglesias Vilarelle co centro Crespo Rivas para evitar o rodeo peonil actual. Explicou que hai espazos que permiten habilitar pasos transversais. A senda terá un orzamento de 60.000 euros e cambiarase o valo actual, afirmou Iván Puentes.
O concelleiro incidiu en que todas as obras que se acometan en toda esta zona escolar non afectará os centros educativos. Tanto no estudo previo como no concurso, engadiu, establécese que se permita tanto a actividade no paseo como nos accesos aos centros, á marxe de que poidan producirse cortes momentáneos pola intervención de maquinaria pesada.
O obxectivo, asegurou, é potenciar o paseo de maneira que se converta nunha conexión entre a natureza e a cidade.
Relacionadas:
-
O Concello non agardará polo 'destape' do Gafos e reabrirá o Paseo de Valle Inclán tras reforzar a súa seguridade
Por Alejandro Espiño |
-
Europa pagará o 'destape' do Gafos, que terá xullo de 2025 como data límite
Por Manu Otero |
-
Augas de Galicia avala o proxecto para liberar o río dos Gafos
Por Oskar Viéitez |
-
Pontevedra executou máis da metade dos 12,5 millóns dos fondos EDUSI
Por Alejandro Espiño |
-
Substituirán os valos de obra da cuberta do Gafos por un valado provisional "máis estético e seguro"
Por Redacción |
-
Sae a licitación a mellora da drenaxe da estrada entre Muíño e Campañó
Por Redacción |
-
Os veciños arrancan ao Concello o compromiso de arranxar unha serie de "deficiencias" no parque de Campolongo
Por Oskar Viéitez |
-
Zafarrancho de podas en varias rúas da cidade
Por Redacción |
-
Solicitan unha subvención de 2 millóns de euros para a apertura do treito urbano do Gafos
Por Redacción |
-
Pontevedra senta as bases para dar un "aire novo" ao mantemento de zonas verdes
Por Alejandro Espiño |
-
As sendas de acceso aos centros educativos de Campolongo estarán listas para o inicio do curso
Por Redacción |