Reunión no Concello de Marín para deseñar as actividades do Entroido
Por Redacción
As concelleiras Marián Sanmartín, Beatriz Rodríguez e Raquel López reuníronse este mércores no Concello de Marín con representantes do Ateneo Santa Cecilia, Os da Caña e Pousos da Area para coordinar a celebración do Entroido dun xeito alternativo ao habitual, para poder conmemorar estas datas cumprindo coas medidas vixentes en materia sanitaria.
Tal e como explicaron as edís, "queremos contar en todo momento cos colectivos que forman parte da organización do noso Entroido, apoiando o seu labor incluso nun ano coma este, no que moitas das cousas que se levaban a cabo non se poden organizar do mesmo xeito ca outros anos".
En concreto, non haberá nin desfiles nin Enterro da Sardiña. O Concello organizará unha festa infantil con animación a fin de semana grande do Entroido. As actividades desenvolveranse na Alameda, aínda que coa posibilidade de trasladalas ao Multiusos se a climatoloxía o esixe.
Para a organización desta festa, o Concello informa que se contratarán comparsas, batucadas e charangas de Marín para que se encarguen de realizar a animación nas rúas, a decoración de diferentes espazos e a organización de obradoiros para os cativos.
Por outra banda, Amigos dos Rapaces estudará adaptar a súa tradicional festa infantil, tras confirmar a suspensión da Festa do Merengue, xa que pola súa propia natureza veríase comprometida a seguridade e o uso da máscara.
Ademais, o Ateneo Santa Cecilia organizará unha exposición na zona acristalada do Multiusos e desde o Concello formuláronlle a posibilidade da realización dun concurso de orellas e filloas o martes de Entroido no Multiusos.
No que respecta ao Enterro da Sardiña, non haberá celebración e no seu lugar decoraranse as rúas con lonas nas que se verán imaxes doutros anos e o Palco de Música engalanarase o Mércores de Cinza para realizar o velorio.
Finalmente, o domingo día 6 de febreiro celebrarase a festa do Bolo do Pote e o Museo Torres acollerá unha exposición durante os días de festa sobre o Entroido tradicional galego.
Relacionadas:
-
Festas infantís, animación e exposicións no Entroido 2022 de Marín
Por Redacción |
-
Só as murgas e Ravachol se salvan do tradicional Entroido pontevedrés
Por Alejandro Espiño |
-
O Entroido de Vilagarcía recupera o desfile de disfraces pero perde o certame de comparsas e o baile infantil
Por Redacción |
-
Suspendido o Enterro da Sardiña de Marín
Por Redacción |
-
O Entroido que non se vive na rúa tomou forza nos colexios
Por Redacción |
-
Marín inaugura o seu Entroido en liña coas comparsas Os Paparrulos e Os da Caña
Por Redacción |