Todo preparado para que a planta de tratamento de auga potable de Lérez xere enerxía eléctrica para auto abastecerse
Por Anxo Lourido
A Estación de Tratamento de Auga potable de Lérez (ETAP) xa ten instalada a turbina que permitirá o auto abastecemento de enerxía eléctrica a estas instalacións. Segundo informaba este luns, a portavoz municipal Anabel Gulías, o Concello e Viaqua, a empresa concesionaria do servizo, implantaron este sistema de xeración hidráulica de cero emisións de CO2, utilizando enerxía renovable e non contaminante.
A planta situada en Lérez xa conta co equipo de bomba que funciona como turbina acompañado de accesorios hidráulicos, encargados de transformar a enerxía potencial a través dos saltos de auga das instalacións.
Segundo explicaba Gulías, as previsións técnicas establecen entre un 85 e un 100% a enerxía que proporcionará este sistema para cubrir a actividade eléctrica actual da ETAP. A variación deste abastecemento dependerá do caudal do encoro do Pontillón do Castro, que se alimenta unicamente da auga de choiva.
Para a instalación deste sistema evitouse a ampliación das instalacións e o custo do proxecto sitúase en 320.000 euros, explicou a portavoz municipal, quen lembrou a evolución do encoro desde a súa creación en 1955 e o seu paso en 2007 a espazo deportivo, que agora permitirá xerar enerxía para a Estación de Tratamento de Auga.
Anabel Gulías explicou que este tema tratouse na Xunta de Goberno do Concello e a posta en marcha do sistema depende da autorización da Consellería de Industria, a quen se lle solicitou tempo atrás desde os servizos municipais, indicaba a representante do goberno bipartito.
A produción de enerxía eléctrica inicialmente será para uso e aproveitamento da estación potabilizadora, pero no caso de que se xere unha maior produción estudaríase o seu traspaso á rede eléctrica municipal. Anabel Gulías indicou que son medidas que axudará a facer fronte ao encarecemento da factura eléctrica.
Relacionadas:
-
Carme da Silva, concelleira responsable do Ciclo da Auga: "O ano hidrolóxico está por debaixo da media. Pode ser complicado"
Por Mónica Patxot & Anxo Lourido |
-
Impulsan novas obras de saneamento en Cerponzóns e de abastecemento en Marcón e Tomeza
Por Alejandro Espiño |
-
Pontevedra creará un centro de interpretación da auga con fondos Next Generation
Por Alejandro Espiño |
-
A nova iluminación da Avenida de Ourense consegue un aforro enerxético do 26%
Por Redacción |
-
Pontevedra substitúe unha tubaxe para garantir o abastecemento en alta de Poio e Sanxenxo "para moitos anos"
Por Oskar Viéitez |
-
Pontevedra renova as bombas da estación de Monte Porreiro para optimizar o abastecemento
Por Alejandro Espiño |
-
O alcalde Fernández Lores visita as obras de impermeabilización do depósito de Lérez
Por Redacción |