Substituirán os valos de obra da cuberta do Gafos por un valado provisional "máis estético e seguro"
Por Redacción
O concelleiro de Desenvolvemento Sostible e Medio Natural, Iván Puentes, vén de asinar o documento de contratación das obras que permitirán substituír os actuais valos de obra que protexen o perímetro do Paseo de Valle-Inclán, no parque de Campolongo, por un valado máis estético e seguro, de metro e medio de altura.
As actuacións, que serán executadas pola firma Construcciones Obras y Viales SA, (Covsa) contan cun orzamento de 28.421 euros e suporán a creación de diversas zonas de paso intermedias por lugares seguros para conectar a rúa Iglesias Vilarelle coa senda que se fixo polo lado do colexio de Campolongo e a Escola Crespo Rivas, evitando ter que rodear toda a área valada e mellorando a mobilidade.
Ademais, tal e como explicou Iván Puentes "esta intervención completarase coa extensión da actual senda desde a EEI Crespo Rivas ata a zona final da Praza da Constitución e coa construción dunha senda semellante a esta polo lado de Iglesias Vilarelle, de xeito que, en conxunto, poderemos recuperar a mobilidade por ámbalas marxes da canle do Gafos entre a Praza da Constitución e Xeneral Rubín, con conexións intermedias".
En paralelo, a Concellería de Desenvolvemento Sostible destinou outros 19.877 euros a un proxecto de mellora integral de toda a Praza da Constitución e o contorno do parque infantil de Campolongo, incluíndo a nivelación do pavimento e eliminación de fochas, a mellora das canalizacións de augas pluviais, o pintado de diversos elementos e a reparación e limpeza de bancos e mobiliario (xa foron restaurados tódolos bancos do contorno da igrexa e mailo parque infantil).
Este último contrato, adxudicado á firma Garocaprim SL, tamén contempla a instalación dunha vintena de novos bancos no propio Paseo de Valle-Inclán, a Praza da Constitución e a zona do paseo que discorre despois de Iglesias Vilarelle, segundo petición expresa dos veciños de Campolongo.
Puentes asegurou que "á espera de que se lle poida dar a solución definitiva que todos agardamos", a través do proxecto para destapar e restaurar ecoloxicamente o treito urbano do río dos Gafos "manteremos a actual 'tapa' da canle valada, nas mellores condicións estéticas e de seguridade".
Neste sentido, Iván Puentes indicou que o Concello xa ten asinado o contrato co Colexio de Arquitectos de Galicia (COAG) "e o único trámite burocrático que queda pendente é notificarllo oficialmente para que poidan poñer a maquinaria a funcionar" e lanzar o concurso internacional de ideas "algo que agardamos facer nos vindeiros días".
Para este proxecto o Concello solicitou axudas de financiamento por valor duns 4 millóns de euros.
Puentes lembrou que o concurso de ideas para a recuperación e restauración ecolóxica do tramo urbano soterrado do Gafos "permitirá seleccionar a proposta gañadora, isto é, a adxudicataria do primeiro premio, que será a redacción do proxecto de execución da actuación".
Relacionadas:
-
Posta a punto do paseo dos Gafos desde a estación ata Campolongo
Por Redacción |
-
O Concello non agardará polo 'destape' do Gafos e reabrirá o Paseo de Valle Inclán tras reforzar a súa seguridade
Por Alejandro Espiño |
-
Europa pagará o 'destape' do Gafos, que terá xullo de 2025 como data límite
Por Manu Otero |
-
Augas de Galicia avala o proxecto para liberar o río dos Gafos
Por Oskar Viéitez |
-
A orixe da vertedura a un regato de San Miguel de Deiro era unha lavadora dunha vivenda particular
Por Redacción |
-
Día da Auga, día para aparcar os libros e limpar a contorna do Gafos
Por Raquel Currás Martínez |
-
Os veciños arrancan ao Concello o compromiso de arranxar unha serie de "deficiencias" no parque de Campolongo
Por Oskar Viéitez |
-
Os veciños de Campolongo piden o inicio da obra de descuberta do tramo urbano do Gafos neste mandato
Por Anxo Lourido |