A Policía Local e o CIM 'alíanse' para axudar o alumnado da ESO a identificar violencias machistas
Por Alejandro Espiño
A idade media das vítimas da violencia machista en Pontevedra sitúase nos 32 anos. É un dato "moi baixo", recoñecen desde o goberno municipal, que evidencia que entre os mozos se manteñen "actitudes machistas" que hai que combater desde os poderes públicos.
Por iso, o equipo da Policía Local integrado no sistema VioGén, en colaboración co Centro de Información á Muller (CIM) de Pontevedra, iniciarán unha serie de charlas nos institutos para axudar aos alumnos da ESO para identificar estes comportamentos.
A edil de Seguridade Cidadá, Eva Vilaverde, explicou que "nos preocupa" o incremento de casos de violencia de xénero que se rexistran na cidade, polo que o Concello entende que se deben reforzar os programas de prevención e formación entre a cidadanía.
O obxectivo é que as vítimas potenciais ou os seus achegados "estean alerta" ante posibles casos de violencia machista, que os denuncien ante as autoridades e se usen os recursos dispoñibles para atender ás mulleres que sufran este tipo de episodios.
O goberno municipal optou por iniciar esta nova campaña cos mozos ao entender que son un "espectro especialmente sensible". Así, os primeiros en asistir a estas charlas será o alumnado de 4º da ESO de tres institutos da cidade.
As charlas comezarán mañá mércores 20 de abril no IES Valle Inclán e continuarán o 10 de maio no IES Torrente Ballester e o 14 de xuño no IES Sánchez Cantón. Impartiranas o xefe do equipo VioGén en Pontevedra, Ángel Ruibal, e persoal do CIM.
Ademais, este xoves 21 de abril tamén recibirán formación o profesorado do Valle Inclán, a petición propia, algo que agradecen desde o Concello porque "son os que teñen unha maior influencia sobre os rapaces e contacto a diario con eles".
Os contidos que se impartirán nesta charla estarán adaptados a cada nivel educativo, incluíndo a orixe e tipos de violencias machistas, como identificalas, coñecer os ciclos desta violencia e os recursos que existen ou como traballa a Policía Local e como denunciar.
Todo este contido será trasladado aos adolescentes mediante casos concretos e facilmente identificables para eles "para que saiban que a violencia de xénero está máis preto do que pensamos" e como identificar os casos para "corrixir actitudes", subliñou Vilaverde.
O equipo da Policía Local integrado no sistema VioGén, explicou a responsable de Seguridade Cidadá, está formado actualmente por dous axentes, aos que se sumará proximamente unha terceira que xa está a recibir a formación específica.
Desempeñan o seu traballo nas dependencias do CIM para que as vítimas non teñan que acudir á xefatura da Policía Local e reciban o asesoramento de persoal cualificado. Ademais, os axentes que protexen ás vítimas non van uniformados para que estas mulleres non sexan revictimizadas ou estigmatizadas por levar escolta.
Relacionadas:
-
Minuto de silencio na Subdelegación polo asasinato machista da veciña de Teis: "É unha lacra que non para"
Por Diana Eiras & Anxo Lourido |
-
A provincia suma 1.304 casos en seguimento por violencia de xénero
Por Redacción |
-
"Cando tes medo da túa parella, aí deberían saltar todas as alarmas"
Por Natalia Puga & Mónica Patxot |
-
8M | As mulleres toman as rúas de Pontevedra baixo o lema "Nin escravas, nin heroínas, mulleres con dereitos xa"
Por Mónica Patxot & Redacción |
-
Ciberacoso, 'sextorsión', insultos ou hackeos: así actúan os 'machitroles' nas redes
Por Redacción |
-
O 90 % dos homes axuizados por violencia de xénero resultan condenados
Por Redacción & Mónica Patxot |