'Pedalear e conversar', a iniciativa de triciclos eléctricos adaptados para fomentar as relacións
Por Mónica Patxot & María José Pita
Despois de facer as primeiras rutas de proba, en breve os vehículos eléctricos do programa 'Pedalear e conversar' percorrerán as rúas de Pontevedra. Mediante paseos en triciclo eléctrico especialmente adaptado, este programa impulsado por Afundación, a Obra Social de ABANCA, reivindica unha forma sostible de vivir as cidades creando novas relacións entre as persoas voluntarias e maiores participantes, e axudando, así mesmo, a paliar situacións de soidade.
Este martes presentábase esta iniciativa na sede do Auditorio da rúa Augusto González Besada coa participación de Sabela Couceiro, coordinadora da Área de Maiores de Afundación; Berna Lindín, coordinadora do Espazo +60 Afundación de Pontevedra; Marcos Rey, concelleiro de Benestar Social de Pontevedra; e Daniel Macenlle, director xeral de Protección Cidadá do Concello de Pontevedra. Como persoas usuarias deste programa asistiron as socias do Espazo +60 Afundación Pontevedra, Dolores Cendón e Guadalupe del Río, que aparecen nas fotografías probando os triciclos, e as persoas residentes en Saraiva Joaquín Saborido e Tonita Montoya, centro que tamén se beneficiará deste programa.
Dinamizado desde a área de Maiores de Afundación, 'Pedalear e conversar' enmárcase no movemento internacional 'En bici sen idade', iniciado en Dinamarca.
Ole Kassow foi o creador do mesmo a partir dunha experiencia persoal en Copenhague en 2013. O seu pai sufría esclerose múltiple e, ao pasar por diante dun centro de persoas maiores, decatouse de que chegada unha idade o uso da bicicleta podería serlle imposible. Así, involucrouse en defender o dereito de "sentir o vento na cara" sen importar as limitacións dos anos ou as condicións físicas. Con esta premisa, xurdiu un movemento que xa se encontra activo en 52 países.
Pontevedra é a terceira cidade galega á que chega este programa, tras A Coruña e máis recentemente Vigo. No territorio nacional, está implantado en Donosti, Madrid, Alacante, Albacete, Zaragoza ou Barcelona.
Nestas primeiras probas, as persoas usuarias manifestan a súa felicidade por un servizo que non só lles permitirá volver a visitar diferentes puntos da cidade, senón que tamén fomenta a conversa e o intercambio interxeneracional, coas outras persoas usuarias e co equipo de voluntariado. Nin Loli, aos seus 87 anos, nin Lupe, de 74, montaran nunca en bicicleta e as sensacións son máis ca positivas.
Hai deseñados cinco percorridos de ao redor de dúas horas, nos que se inclúen paradas para desfrutar dos lugares e do intercambio cos acompañantes polo Centro Histórico, Illa das Esculturas, Xunqueiras de Alba, zona comercial de Pontevedra e o paseo pola ría cara a Marín. A idea é que sempre saian á vez os dous triciclos eléctricos dos que dispón o programa, así se posibilitará a interacción entre catro persoas.
Desde a organización sinalan que Pontevedra é unha cidade perfecta para que se poidan desenvolver este tipo de desprazamentos adaptados a todo tipo de mobilidades.
En canto ás persoas voluntarias para formar parte do equipo de apoio e pedaleo, de momento o programa conta con seis. Neste sentido, Afundación convoca unha formación para o sábado 7 de maio na Residencia de Estudantes da avenida de Vigo de 10:30 a 13:30 para aquelas persoas que se queiran unir ao programa como voluntarios. Hai 15 prazas previstas e só se require ser maior de 18 anos, saber andar en bicicleta e ter unha sensibilidade pola área do maior. Toda a información pódese recabar na sede da Obra Social de Abanca en Pontevedra e Espazo +60 Afundación Pontevedra na praza de San Xosé e no apartado de voluntariado do programa 'Pedalear e conversar' en Pontevedra na web de Afundacion.
Relacionadas:
-
Paseos en triciclo eléctrico adaptado para que gozar do Nadal non teña limitacións de idade
Por Redacción |
-
O musical "Romeo e Julieta" estréase esta fin de semana no Auditorio de Afundación en Pontevedra
Por Redacción |
-
O grupo de teatro Espazo +60 sobe o pano tras dous anos de pandemia con risa asegurada
Por Mónica Patxot & María José Pita |
-
Ioga ao aire libre para espantar os medos da pandemia
Por Mónica Patxot & María José Pita |
-
Regresan as actividades presenciais ao Espazo +60 de Afundación en Pontevedra
Por Redacción |