A Sección Cuarta da Audiencia de Pontevedra condenou en conformidade a Ramiro Cerdeira Portela, o traballador de Ence acusado dun delito de atentado contra o alcalde de Pontevedra, Miguel Anxo Fernández Lores. 

O acordo de conformidade supón que o acusado admite a autoría dos feitos a cambio dunha rebaixa na petición inicial de penas que era dun ano de prisión e unha multa de 1.470 euros por un delito de atentado contra a autoridade e que finalmente, queda nun delito leve de falta de respecto á autoridade co pago dun mes de multa cunha cota diaria 6 euros, o que supón un total 180 euros. "Teño que estar tranquilo e relaxado", comentou o procesado.

Ramiro Cerdeira, visiblemente emocionado, explicou á saída da Audiencia que "ao final nos fixeron unha proposta, entre o meu avogado e eu falámolo e decidimos que iamos aceptar". Tamén insistiu en "teño clarísimo" que "imos seguir defendendo os nosos postos de traballo, os dos meus compañeiros e o meu, o pan dos meus fillos porque grazas a esta fábrica vivimos moita xente".

O feitos obxecto desta causa tiveron lugar en marzo de 2021 durante o peche dun grupo de traballadores da fábrica de Lourizán no Concello de Pontevedra. O escrito de acusación da Fiscalía relata como cando o rexedor e varios concelleiros saían das dependencias municipais, o procesado "tentou abalanzarse sobre o tenente de alcalde, séndolle impedido polos axentes policiais".

Engade o Ministerio Público que cando Fernández Lores, saía do aparcamento ao volante do seu vehículo particular, fíxoo protexido por outro cordón policial xa que os traballadores "impedíanlle, con berros e insultos, a saída", destacando ao acusado neste comportamento e sinalando que Ramiro "chegou a dar dúas patadas ao vehículo do alcalde, que non sufriu danos". Segundo a Fiscalía, realizou estes actos "desprezando o principio de autoridade".

Este delegado de Comisións Obreiras en Ence apuntou que hoxe defendeu ante o tribunal provincial que "non son ningún delincuente e non lle fixen mal a ninguén" e tamén explicou que aquel día "fixemos unha concentración polo noso conflito laboral".

Preguntado polos xornalistas por se se arrepentía do sucedido, Ramiro Cerdeira asegurou que "eu non lle fixen mal a ninguén, non me arrepinto de nada" e precisou que "nin mandamos a ninguén ao sanatorio nin lle dei unha patada a ninguén, nada, e o coche non tiña ningún dano".

CONCENTRACIÓN DE APOIO

No exterior da Audiencia de Pontevedra concentráronse este xoves un centenar de persoas, entre delegados de Comisións Obreiras e operarios da fábrica de Ence, que acudiron ao Pazo de  Xustiza a expresar o seu apoio ao compañeiro procesado. "Estou moi agradecido con todos e vexo que son unha persoa apoiada", respondeu o procesado.

Entre as persoas que se concentraron ante a Audiencia atopábase a secretaria xeral de Comisións Obreiras en Galicia, Amelia Pérez Álvarez, que incidiu en que "é lamentable que teñamos que estar aquí hoxe cando o único que facemos as organizacións sindicais é defender os postos de traballo".

Amelia Pérez tamén engadiu que lle parece "lamentable que unha autoridade pública monte este numerito con estas denuncias" e relacionou este caso co incidente ocorrido en Ourense entre o alcalde da cidade, Gonzalo Jácome, con outra sindicalista.  "Non imos tolerar nin imos normalizar que se criminalicen as nosas actuacións", remachou a líder de Comisións Obreiras en Galicia.

Pola súa banda, a presidenta do comité de oficinas centrais da fábrica de Ence en Pontevedra, Ana Cedeira, afirmou que "estamos sufriendo ataques constantemente por parte del Concello de Pontevedra y del Gobierno central" e criticou ao alcalde porque "ni se ha dignado en dar la cara y venir aquí" e facendo fincapé en que van seguir coas súas mobilizacións "por muchas actuaciones barriobajeras que haga Lores y compañía". 

A próxima protesta será unha marcha convocada para o 27 de maio ao Porto de Marín para agradecer á Autoridade Portuaria que promova a adscrición dos terreos que ocupa Ence que permitiría, segundo argumentan, a continuidade da fábrica sorteando unha sentenza en contra.