Semana de altas presións nas Rías Baixas con ceos solleiros
Por Redacción
Galicia continúa este luns 9 de maio baixo a influencia das altas presións, con aire cálido en superficie e ceo despexado en xeral, segundo indica o servizo de Meteogalicia. Co avance da xornada entrarán brétemas polo litoral. As temperaturas mínimas descenderán lixeiramente para establecerse en 12 graos mentres que as máximas manteranse sen cambios no interior e con descensos no litoral alcanzando os termómetros os 26 graos. O vento soprará frouxo de dirección variable.
Para o martes 10 espérase que continúe a influencia das altas presións, con ventos do noroeste que ofrecerán humidade na franxa costeira. Os ceos seguirán presentándose pouco nubrados en xeral, con algún intervalo de nubes altas. No litoral iniciarase o día con brumas que irán desaparecendo co avance do día para volver presentarse a medida que anoiteza. As temperaturas moveranse entre os 9 e os 24 graos con ventos frouxos do noroeste.
Seguirán sen rexistrarse grandes cambios durante o mércores. Os ventos seguirán soprando frouxos do noroeste e os ceos permanecerán despexados en xeral, salvo na franxa costeira con brumas que irán abrindo ao longo do día e, outra vez, con retorno ao entrar a noite. As temperaturas situaranse entre os 9 de mínima e os 19 de máxima.
No segundo tramo da semana tampouco se prevé un cambio significativo. A probabilidade de precipitacións seguirá sendo baixa con temperaturas altas para esta época do ano especialmente no interior. Os termómetros moveranse entre os 10 e os 26 graos.