Ence ten previsto realizar investimentos por un total de 395 millóns de euros na fábrica de Lourizán no caso de que o Tribunal Supremo ofreza unha resolución que anule a sentenza da Audiencia Nacional, na que se consideraba ilegal a prórroga para que a empresa se manteña na ría ata 2073.

Antonio Casal, director territorial de Ence en Galicia, comparecía este mércores ante os medios de comunicación para explicar o plan de investimentos que teñen previsto ata 2073. De maneira inmediata, ao longo do próximo lustro realizaríanse investimentos de 40 millóns dentro dese plan para mellorar a eficiencia operacional e ambiental, atendendo á tramitación da proposta de ampliación do Proxecto Sectorial de Incidencia Supramunicipal. 

O representante da fábrica pasteira explica que a entidade mantén a súa aposta por Pontevedra e explicou que, en caso dunha resolución contraria aos seus intereses, acudirán ás instancias superiores, o Tribunal Europeo, ata esgotar todas as vías xurídicas para defender a legalidade da prórroga extraordinaria da concesión en Lourizán.

Casal observa con optimismo o futuro tras a admisión a trámite de dous dos recursos de casación presentados contra as sentenzas da Audiencia Nacional. Agarda que a sentenza se coñeza a finais de ano. "Estamos traballando para que a empresa siga adiante", asegura o dirixente e sinala que se manterán á espera de que se emita esa sentenza e coñézase exactamente o texto concreto da resolución.

Insiste en que os dous estudos previos solicitados pola empresa demostraron que non había localizacións posibles para trasladar a fábrica pontevedresa: "non había ningunha localización posible do tamaño da biofábrica de Pontevedra. Ninguén indicou un sitio onde se poida facer. A conclusión é que non o hai".

Por este motivo, entende que o estudo contratado polo Goberno central a Tragsa para buscar localizacións non resultará satisfactorio: "estou convencido de que non van atopar un lugar posible" porque lembra que as condicións para unha factoría destas características son moi complexas.

Por outra banda, recoñeceu que ten poucos datos sobre o proxecto que a competidora no terreo da celulosa, Altri, anunciou para poñer en marcha en Palas de Rei. En todo caso, aclara que é un proxecto diferente, que traballa con "moitas menos toneladas" e descoñece se existe masa forestal suficiente para dúas fábricas de celulosa en Galicia. 

En canto á posibilidade de que os terreos que actualmente ocupan en Lourizán se adscriban ao Porto de Marín, Antonio Casal indicou que "a nosa vía é defender a concesión tal e como está" e mantivo que esa opción é unha proposta de Comisiones Obreras e que foi aceptada polo Porto de Marín pero "non me atrevería a valoralo como posible ou non posible", expuxo indicando que todo dependería do Goberno central.

Antonio Casal, sobre o traslado: "Ninguén indicou un sitio onde se poida facer. A conclusión é que non o hai"

A compañía indica que o seu plan previsto para os próximos anos permitirá que a factoría sexa máis eficiente e con menor impacto ambiental, argumentou explicando que xa agora é mínimo. A intención será avanzar na redución da pegada de carbono cun menor consumo de CO2, menor utilización de combustibles fósiles, menor consumo de químicos e de auga; ademais de xerar máis enerxía renovable e aumentar a produción de produtos especiais dentro da bioeconomía circular substituíndo plásticos por produtos especiais de celulosa kraft. 

Na actualidade, segundo a empresa, a biofábrica conta con máis de 400 traballadores en nómina, aos que se suman outras 400 persoas de empresas adxacentes que traballan tamén no recinto, lembrou Casal, apuntando que a incidencia no emprego na comarca é de 5.100 postos de traballo.