Sanxenxo autoriza as fogueiras de San Xoan en Lavapanos, Panadeira, Silgar e Caneliñas
Por Redacción
As fogueiras de San Xoan en Sanxenxo estarán permitidas en catro praias.
As elixidas polo Concello para celebrar a festa, previa solicitude de autorización, son: Lavapanos, Panadeira, Silgar e Caneliñas, polo que "non se poderán acender fogueiras en ningún outro areal do municipio". Os particulares que desexen realizar fogueiras nas súas leiras particulares ou prazas públicas tamén deberán solicitar permiso.
O prazo para a solicitude de autorización e identificación dos responsables abrirase este luns 30 de maio e prolongarase ata o 21 de xuño ás 15:00 horas. Os interesados deberán presentar no rexistro municipal, vía electrónica ou presencial, unha comunicación previa. Unha vez realizado o trámite, o responsable deberá asinar a normativa que deberá cumprir.
A Concellería de Medio Ambiente realizará unha listaxe cos participantes e os lugares e entregaraos á Policía Local e Emerxencias de Sanxenxo. Ambos os departamentos municipais coordinarán o dispositivo de vixilancia e control durante as noites do 23 ao 24 de xuño.
Ademais, o Concello poñerá en marcha un operativo especial da Policía Local, os servizos de emerxencia e o servizo de limpeza. O horario de vixencia para a autorización das fogueiras será exclusivamente para a noite do día 23, desde as 22 horas ás 6 horas do 24, período no que quedará prohibido o baño. As persoas con autorización poderán baixar o material á praia a partir das 21 horas. Ás seis da mañá evacuaranse as praias para proceder á súa limpeza garantido que estarán en perfectas condicións á primeira hora da mañá.
Por motivos de seguridade, desde o goberno local advirten que non estará permitido o uso de tendas de campaña nin tampouco de faroliños tailandeses. Outras medidas preventivas son a colocación de valos para delimitar os espazos autorizados e bidóns para a recollida de cinza. Entre os requisitos esixidos para poder realizar as fogueiras nos devanditos areais atópase a queima unicamente de leña limpa e en ningún caso de materiais plásticos, madeiras pintadas ou con cravos. Tampouco se poderán levar á praia botellas ou vasos de vidro, nin reproducir música cun volume que poida molestar a zonas de vivendas.
Relacionadas:
-
Haberá dezaseis fogueiras nas tres praias de Sanxenxo reservadas para San Xoán
Por Redacción |
-
A praia de Baltar contará desde esta fin de semana con catro pistas deportivas e un renovado aquapark
Por Redacción |
-
Prohibido facer cacharelas nas praias de Marín
Por Redacción |
-
As praias de Areas, Silgar, Canelas e Montalvo contarán con socorristas desde esta fin de semana
Por Redacción |
-
Aberto o prazo ata o 17 de xuño de solicitude de permisos para as fogueiras de San Xoán 2022
Por Redacción |
-
Abre o prazo de solicitude en Bueu para as fogueiras de San Xoán e San Pedro
Por Redacción |
-
A Xunta subvenciona a contratación de socorristas para os meses de xullo e agosto
Por Redacción |
-
Sanxenxo prohibirá que se deixen antucas ou cadeiras na praia para reservar espazos
Por Oskar Viéitez |