Preocupación nas autoridades polo aumento de casos de violencia machista en Pontevedra
Por Alejandro Espiño
Os casos de violencia machista están a se incrementar tras a pandemia. Deste fenómeno, que está a ser global, non é allea a cidade de Pontevedra. No primeiros cinco meses do ano, rexistrouse un aumento do 22% no número de denuncias, segundo recollen as estatísticas oficiais.
Aínda que en termos cuantitativos "non son cifras alarmantes", as autoridades expresaron a súa preocupación, xa que reflicten unha tendencia indesexable. Así o apuntaron a subdelegada do Goberno, Maica Larriba, e o alcalde, Miguel Anxo Fernández Lores.
As forzas e corpos de seguridade, segundo Larriba, "van duplicar os seus esforzos" para combater esta lacra e reforzarase o número de axentes destinados á comisaría de Pontevedra, que se sumarán á "total disposición" dos efectivos da Unidade de Prevención e Reacción (UPR).
Ademais, haberá "puntos violeta" en todos os eventos lúdicos e festivos que se organicen e solicitarase a colaboración de establecementos comerciais e colectivos de voluntarios para crear unha rede de apoio a posibles vítimas da violencia machista.
Este foi un dos asuntos que se trataron este luns na reunión da xunta local de seguridade na que, entre outros asuntos, acordouse que todos os corpos policiais -Garda Civil, Policía Nacional, Policía Local e Policía Autonómica- se coordinen "evento por evento" para reforzar a seguridade na cidade durante este verán.
Entre as actividades que terán unha máxima prioridade por parte das autoridades estarán as Festas de Verán, as Festas da Peregrina ou a Feira Franca, xunto coa proba da Copa do Mundo de tríatlon que se celebrará o próximo 24 de xullo.
Esta proba servirá de test, tamén en materia de seguridade, para a Gran Final das Series Mundiais de tríatlon que Pontevedra acollerá en 2023 e que atraerán á cidade a máis de 17.000 persoas entre deportistas e acompañantes.
Relacionadas:
-
A colaboración cidadá destapa un caso de violencia machista no que a muller non denunciaba por medo
Por Redacción |
-
Detido un mozo de 18 anos por acosar, insultar e agredir á súa parella, menor de idade
Por Redacción |
-
Pontevedra empeza a traballar no seu quinto Plan de Igualdade, que se aprobará en marzo do 2023
Por Redacción |
-
Un libro para tomar conciencia da violencia de xénero a través dos sentimentos dunha vítima
Por Natalia Puga & Mónica Patxot |
-
Minuto de silencio na Subdelegación polo asasinato machista da veciña de Teis: "É unha lacra que non para"
Por Diana Eiras & Anxo Lourido |
-
A provincia suma 1.304 casos en seguimento por violencia de xénero
Por Redacción |