Máis dun centenar de comercios colaboran na "cea solidaria" da asociación contra o cancro
Por Redacción
Máis dun centenar de comercios de Pontevedra e arredores colaboran coa celebración da XXV edición da Cea Solidaria da Asociación Española Contra o Cancro en Pontevedra, unha lista que se ampliará durante as próximas semanas.
Ademais, recoñecidos pintores da provincia tamén se unen a este evento coa cesión dalgunha das súas obras.
O evento, que chega nesta edición aos seus 25 anos, terá lugar nas instalacións do parque do Liceo Casino (A Caeira), o próximo día 22 de xullo desde as 21.00 horas. O custo da entrada é de 45 euros. Aquelas persoas que queiran asistir tan só deben reservar/comprar a súa entrada no novo espazo da Asociación na rúa Eduardo Pondal 64A (en horario de 08.00 a 14.30 horas) ou chamar ao número gratuíto e 24 horas, 900 100 036 ou ao 660 10 91 99.
Desde a organización prometen que haberá moitas sorpresas: unha tómbola cos agasallos doados polo comercio de Pontevedra e arredores, sorteo de cadros de artistas da cidade e amenización musical.
O recadado neste evento destinarase a seguir financiando todos os programas e servizos que a Asociación ofrece, de maneira gratuíta, aos pacientes de cancro e a súa contorna e entre os que se atopan, a atención psicolóxica durante todo o proceso, atención social, axudas económicas, préstamo de material ortoprotésico (camas, andadores, perrucas, cadeiras de rodas, etc), exercicio físico oncolóxico, campañas de prevención, acompañamentos en hospitais e domicilios e programas de investigación en cancro.
Relacionadas:
-
Diagnosticadas de cancro de mama e competindo na Copa de España de Barco Dragón de Piragüismo
Por Redacción |
-
A Asociación Contra o Cancro celebrará a súa Cea Solidaria o 22 de xullo no Liceo Casino
Por Redacción |
-
O Servizo de Aparello Dixestivo de Montecelo, líder galego na busca dun tratamento para o fígado graxo
Por Redacción |