A Policía Local de Vilagarcía retoma as patrullas en bicicleta por praias e espazos peonís
Por Redacción
A Policía Local volve a patrullar os espazos peonís e praias de Vilagarcía en bicicleta este verán. O servizo comezou a funcionar con quendas de mañá e tarde co obxectivo de chegar e estar presentes nas zonas do municipio ás que non poden acceder en coche ou que, polos longos percorridos, dificulta facelo a pé.
O labor dos cicloaxentes centrarase nas zonas peonís, paseo marítimo e praias. O Concello dispón de cinco bicicletas híbridas para o servizo e os axentes foron debidamente uniformados segundo a normativa en vigor para as patrullas ciclistas.
Estes axentes velarán pola normal convivencia entre ciclistas e peóns nas zonas de uso comúns e polo correcto uso das ciclovías e carrís bici. Encargaranse de que os ciclistas e outro tipo de ciclos ou patíns a motor circulen á velocidade e axeitada, similar ao paso dos peóns nas zonas de uso compartido, respectando as debidas normas de seguridade.
Os gardas levarán a cabo un labor principalmente informativa e educativa, aínda que tamén denunciarán os casos reincidentes ou graves.
Non obstante, o seu traballo abarcará todas as demais funcións correspondentes ao corpo e prestarán especial atención a garantir que os propietarios de cans cumpran as normas, tanto ás relativas á recollida de feces como aos lugares polos que poden soltar aos animais e os horarios para facelo.
Moveranse principalmente pola franxa marítima entre Carril e Vilaxoán, pasando polo centro urbano e parques públicos.
Para o desenvolvemento deste servizo, o Concello adquiriu xa hai uns anos 5 bicicletas híbridas dotadas de baterías extraíbles e recargables mediante conexión á rede eléctrica.
A idea é dotar a dúas patrullas de dous axentes cada unha, e manter unha bicicleta como reposto. Trátase de vehículos híbridos que permiten alternar a impulsión por pedaleo coa de motor eléctrico. Os vehículos levan sistema de control do nivel de asistencia para selección a potencia do motor a través do guiador, contan con luces dianteiras e traseiras con alimentación por batería, dispoñen de alforxa e van correctamente rotuladas segundo a normativa policial.
Relacionadas:
-
Vilagarcía, finalista nos premios Bikefriendly 2023
Por Oskar Viéitez |
-
Un total de 68 pontevedreses recibiron axudas da Xunta para comprar unha bici eléctrica
Por Oskar Viéitez |
-
Pontevedra estuda crear un rexistro de ADN para feces de cans
Por Oskar Viéitez & Mónica Patxot |
-
Detido un mozo por conducir drogado, carecendo de carné e mentindo sobre a súa identidade
Por Redacción |
-
Arrestado un veciño de Vilagarcía por romper o parabrisas dun coche patrulla e golpear a un axente de policía
Por Redacción |
-
Clubs deportivos e a Policía Nacional aúnan esforzos para erradicar comportamentos intolerantes
Por Redacción |