Piden que se prohíba fumar nas illas de Ons, Cíes e Cortegada para evitar incendios
Por Alejandro Espiño
A asociación Nofumadores.org presentou máis de 77.000 firmas para pedir ao Ministerio para a Transición Ecolóxica que prohiba fumar en todos os parques nacionais de España.
De aprobarse esta medida, afectaría ás Illas Atlánticas galegas, polo que non se permitiría acender cigarros en todo o ámbito das illas Cíes, Ons e Cortegada.
Este colectivo entende que "non ten sentido que en zonas nas que está prohibido facer grellada poidas fumar un cigarro", segundo a súa presidenta Raquel Fernández Megina, que lamenta o "estraño silencio" sobre os incendios provocados por cabichas mal apagadas.
A través da campaña Parques Nacionales de España ¡sin humo de tabaco y sin colillas!, Nofumadores.org lembra que un 3,5% dos incendios rexistrados na última década foron ocasionados por cigarros lanzados ao chan.
Isto supuxo, segundo esta asociación, a perda de máis de 20.000 hectáreas de monte.
A entidade apunta que se adoita falar doutras causas dos incendios, como restrollos sen xestionar, maquinaria utilizada fóra de horas e pirómanos, pero apenas se menciona que as cabichas están detrás de case 5.000 hectáreas de bosque queimadas no que vai de 2022.
Lembran que unha das peores catástrofes foi a do incendio de Cebreros (Ávila) en xullo deste ano e que foi causada por unha cabicha, pero aseguran que este non é un caso illado e entre as imprudencias de fumadores sitúan outros dous lumes na Lama e Vigo.
"Trátase de neglixencias perfectamente evitables se se usa a cabeza e prohíbese e castiga acender un cigarro en todos os parques nacionais e bosques de España", insisten.
A asociación sostén que é "inconcibible" que, nun contexto de cambio climático que agudiza a posibilidade de incendios, "non atallemos de raíz este factor porque lle veña mal á industria tabaqueira ou as autoridades teman a reacción dos adictos á nicotina".
Relacionadas:
-
A Xunta ofrece 140 prazas gratuítas para as visitas guiadas polas Illas Atlánticas
Por Redacción |
-
Plan a cinco anos para restaurar os ecosistemas das illas Cíes, Ons e Sálvora
Por Redacción |
-
Denuncian dúas navieiras por un 'pique' entre barcos para chegar antes a Ons
Por Redacción |
-
Poden multar por fumar na praia de Lourido?
Por Oskar Viéitez |
-
O primeiro campus universitario de Galicia libre do fume do tabaco é o de Pontevedra
Por Redacción |