Denuncian dúas navieiras por un 'pique' entre barcos para chegar antes a Ons
Por Redacción
A Garda Civil denunciará dúas navieiras que realizan o servizo de transporte de pasaxeiros á illa de Ons despois de que dous dos seus barcos, que ían coa pasaxe chea, protagonizasen un 'pique' para ver cal de dous era o primeiro en atracar no peirao da illa.
A manobra, que foi gravada en vídeo e difundida a través das redes sociais, será investigada polas autoridades, que consideran que neste episodio cometéronse diversas infraccións, unha delas por levar os barcos unha velocidade inadecuada.
Pique entre dos embarcaciones de pasajeros para atracar primero en la isla de #Ons. La Guardia Civil ha puesto en conocimiento de la Capitanía Marítima de Vigo y de la Autoridad Portuaria de Marín la arriesgada maniobra de aproximación @A3Noticias pic.twitter.com/eHgtyuVS1f
— A3Galicia (@Antena3Galicia) August 24, 2022
Desde o instituto armado avanzan que a denuncia será presentada ante a Autoridade Portuaria de Marín e ante a Capitanía Marítima de Vigo, que son os entes estatais con competencias na zona.
O 'pique' tivo como testemuñas non só os pasaxeiros que ían nos barcos ou os que esperaban no peirao para embarcar de regreso a terra firme, senón tamén unha patrulleira da propia Garda Civil que minutos antes chegara á illa.
Todos eles observaron como as embarcacións de ambas as dúas navieiras comezaron a acelerar e a manobrar de maneira anómala para tentar atracar antes que o outro buque.
Agora serán as dilixencias que se practiquen as que diriman responsabilidades e determinen se a actuación de ambos os barcos foi incorrecta ou, como suxiren algunhas fontes, a temeridade debeuse unicamente a un deles, que tratou de adiantar ao seu rival no último momento.