Malestar en Moraña ante a "reiterada" falta de médicos no centro de saúde
Por Redacción
En Moraña debería haber tres médicos en activo no centro de saúde, pero desde hai tempo só hai dous e, no momento en que un destes colle vacacións ou libra, o municipio queda atendido só por un facultativo. É a denuncia que realiza o Concello de Moraña.
Isto supón que haxa unha atención sanitaria "deficiente" para un municipio como Moraña, con máis de 4.000 habitantes, segundo lamenta o alcalde, José Cela, que trasladou o seu "malestar e descontento" ao novo xerente da área de Pontevedra, José Flores. A todo isto súmase, subliña o rexedor, que a praza que quedou baleira tras a xubilación dun dos profesionais segue sen cubrirse.
"Moitos días só hai un médico traballando", sostén Cela, que esixe que esta situación sexa solucionada polas autoridades sanitarias "canto antes".
"É o Sergas e, por tanto, a Xunta de Galicia, a que ten que xestionar os recursos da nosa sanidade, que agora mesmo está sendo desatendida en Moraña e non podemos seguir admitindo que se manteña esta situación", alega o alcalde.
Cela asegura "entender perfectamente" o malestar que a veciñanza foi trasladando nestes últimos tempos con respecto á atención que se está a prestar no centro de saúde porque "non é un día nin dous, esta situación estase repetindo de xeito reiterado e repetitivo".
A veciñanza de Moraña, reitera o alcalde, "ten dereito a unha sanidade en condicións".
Na conversa mantida polo alcalde co xerente, segundo aseguran desde o Concello, este trasladou que desde a área sanitaria tratarán de resolver o problema á maior brevidade posible.
Relacionadas:
-
José Flores, xerente da área sanitaria, recoñece que a falta de facultativos só poderá resolverse "a medio prazo"
Por Anxo Lourido |
-
Comeza este venres unha obra que "revitalizará" o centro de Moraña
Por Redacción |
-
A Área Sanitaria "estudará" o arranxo da cuberta do centro de saúde de Cuntis
Por Redacción |
-
O alcalde de Moraña aborda co xerente a situación sanitaria da localidade
Por Redacción |
-
A veciñanza de Moraña mobilízase contra a falta de médicos no centro de saúde
Por Redacción |
-
O centro de saúde de Moraña duplicará a superficie cando o Concello modifique o plan urbanístico
Por Redacción | Creada e actualizada