"En toda España e cónstame tamén que en parte de Europa está a observarse un pequeno repunte na heroína". Así o constatou este mércores o comisario provincial da Policía Nacional de Pontevedra, Juan José Diaz Jiménez. 

O responsable policial referiuse á última operación antidroga que continúa aberta na comarca do Salnés, dirixida a unha rede dedicada ao tráfico de heroína, e confirmou este aumento do tráfico desta substancia estupefaciente rexistrado nos últimos tempos. 

A operación en cuestión é xa a terceira fase dunha actuación máis global centrada no tráfico de heroína que tamén ten ramificacións en Portugal e na que, ata o de agora, rexistráronse doce detencións. 

A terceira fase deixou este martes tres detidos na comarca do Salnés tras realizarse unha serie de rexistros en domicilios e naves de Ribadumia, Meis, Meaño, Sanxenxo e Barro. 

O comisario evitou achegar detalles da operación policial porque o xulgado decretou o secreto das actuacións, pero si avanzou que "me consta que vai haber máis fases" ademais do tres xa realizadas. 

A terceira iniciada este martes continúa aberta e as anteriores producíronse hai xa varios meses. Os tres detidos esta semana previsiblemente pasarán a disposición xudicial en Cambados durante a xornada deste xoves 22 de setembro.