A CIG mobilízase para esixir políticas que eviten a perda de poder adquisitivo da clase traballadora
Por Manu Otero
Medio centenar de persoas manifestáronse este xoves fronte á sede da Subdelegación do Goberno de Pontevedra para protestar contra a perda de poder adquisitivo que está a padecer a clase traballadora como consecuencia dunha crise económica que se arrastra desde o ano 2008.
Convocada polo sindicato CIG, ao mediodía deste xoves en todas as cidades de Galicia, os traballadores saíron á rúa para clamar contra unhas medidas ineficaces que están a conducir cara á pobreza á clase media. "A perda de poder adquisitivo é cada vez maior. Á gran maioría da poboación o salario non lle chega. Cada vez hai máis traballadores que non son capaces de facer fronte a un gasto extraordinario, unha avaría nun coche, por exemplo", sostén o secreatio comarcal da CIG en Pontevedra, Marcos Conde.
Denuncian desde a central que as medidas aplicadas polo Goberno non están a fornecer o efecto desexado. "Perxudican cada vez máis á clase traballadora", critica o portavoz sindical, poñendo como exemplo o atraso da idade de xubilación ata os 67 anos.
Por todo isto, están convencidos de que a única vía para "recuperar dereitos" é seguir manifestándose. Xa a pasada semana tomaron as rúas de Santiago para denunciar esta situación, este xoves repetírono nas principais urbes de Galicia e non descartan intensificar as mobilizacións.
Propoñen desde o sindicato un paquete de dez medidas urxentes encamiñadas a establecer salarios dignos e políticas públicas adecuadas que serven para capear a situación de crise e inflación que afecta actualmente a todos os estamentos da sociedade. Xa tras o estalido da crise do 2008, desde a CIG presentaran un documento cun centenar de medidas que, na súa maioría, nunca se chegaron a aplicar polos diferentes gobernos, denuncian desde o sindicato.
Relacionadas:
-
Convocadas protestas da CIG en Pontevedra e Vilagarcía este martes para reclamar salarios e pensións dignas
Por Redacción |
-
Sindicatos municipais urxen unha solución ao Concello para resolver o conflito laboral con Policía Local e Bombeiros
Por Redacción |
-
1 de maio | CIG reclama "salarios dignos" e políticas públicas para frear a carestía da vida
Por Alejandro Espiño & Cristina Saiz |
-
Chamamento social da CIG a participar na Marcha do 1º de Maio porque "a clase traballadora vive na pobreza"
Por Diana Eiras & Mónica Patxot & Anxo Lourido |
-
Chamado da CIG para a mobilización do un de maio "laboral pero tamén con compoñente social"
Por María José Pita |