A tapa de Rubén González, a máis vangardista do Concurso Nacional de Pinchos
Por Alejandro Espiño
Octópoda, a tapa coa que Rubén González (El Cafetín) participaba no Concurso Nacional de Pinchos celebrado en Valladolid, ten premio. O xurado do certame seleccionouna como a tapa máis vangardista das 46 que participaron na competición.
A súa foi unha das seis creacións culinarias que destacaron neste concurso, cuxo gañador foi o chef Ariel Munguía do Restaurante El Puntido (Áraba), que presentou un bocado de bacoriño como elaboración.
"Non podemos estar máis contentos e orgullosos de sumar este premio por, precisamente, o altísimo nivel de todos os colegas que aí participan, que son un orgullo para a profesión", sinalou Rubén González nas súas redes sociais.
O cociñeiro pontevedrés, que recibiu un diploma acreditativo do premio, apostou por un prato de "100% polbo", segundo explicaba a PontevedraViva antes da competición.
A un guiso tradicional de polbo, o cociñeiro engádelle un envoltorio elaborado cunha masa de bolo de pan frito, pil pil de polbo por encima, unha lámina de polbo seco e unha pipeta con salsa de polbo concentrada.
Un "polbo terra", unha verza recuperada para a cociña, completa esta proposta, que presenta dentro dunha "galeuska", unha especie de boneca tipo matrioska rusa co traxe tradicional galego, coa que busca homenaxear especialmente ás mulleres 'pulpeiras'.
Relacionadas:
-
O 'vacalao' de El Cafetín e os canalóns de xarrete do Gumer, gañadores de Pontedetapas
Por Redacción |
-
Pontevedra preséntase na Feira Internacional do Turismo de Interior como “a cidade onde mellor se vive e come do mundo”
Por Redacción |
-
"Octópoda", a tapa coa que Rubén González competirá contra cociñeiros de toda España
Por Alejandro Espiño |