Tino Fernández renuncia ás primarias acusando o PSOE local de falta de neutralidade
Por Alejandro Espiño
Non haberá primarias no PSOE pontevedrés. Un dos dous candidatos, o actual portavoz municipal Tino Fernández, anunciou este venres que retira a súa candidatura. Faino entre duras críticas á executiva municipal do partido, á que acusa de favorecer o seu rival.
A pesar de que, segundo Fernández, "estamos convencidos de dispoñer da maioría suficiente para gañar", el e o seu equipo entenden que "lamentablemente non se dan as circunstancias necesarias para poder expor un proxecto solvente" para os próximos anos.
O dirixente socialista asegura que isto sucede ante o "claro posicionamento" da executiva municipal do PSOE cara ao outro candidato, o edil Iván Puentes, "ao que lle veñen dando cobertura política e apoio desde o primeiro momento, esquecendo a súa obrigación de neutralidade".
"Esta situación agravouse nas últimas semanas ata facer inviable a posibilidade de convivencia con outro candidato que non sexa o seu patrocinado", denuncia Tino Fernández.
Fernández lembra que o partido "xa temos experiencia" acerca de discrepancias entre o candidato elixido polos militantes e a opción do aparato do partido, provocando unha crise no seo da formación socialista "que nos levou a resultados desastrosos".
Tras defender que "non teño ningún interese en facer un Borrell", o portavoz socialista asegura que "polo ben do partido, aínda que discrepando nas formas e en boa parte do fondo, prefiro dar un paso atrás" e retirar a súa candidatura.
A partir do domingo, subliña Tino Fernández, o PSOE terá un candidato ás eleccións municipais de 2023 "ao que lle desexo o mellor".
El, á vez que agradece o apoio e o agarimo recibido por numerosos militantes, seguirá traballando polo partido desde o seu posto actual como portavoz municipal e concelleiro "cumprindo co mandato que os cidadáns expresaron nas urnas no seu momento".
IVÁN PUENTES AGRADECE A RETIRADA
Respecto desta decisión, o outro candidato a estas primarias, Iván Puentes, agradeceu o "xesto" que tivo o seu compañeiro "permitindo que a miña candidatura poida ser xa proclamada e podamos empezar a traballar nas eleccións verdadeiramente importantes".
"Podemos discrepar nas nosas visións de futuro e no papel que debemos ter na cidade, pero deu o máximo de si para que o PSOE estivese convenientemente representado en momentos que non eran fáciles para o partido", engadiu.
Con este proceso terminado, apuntou Puentes, os socialistas deben iniciar o traballo para "preparar o mellor equipo e a mellor proposta entre todos" para convencer á cidadanía e tentar liderar o próximo goberno municipal.
Iván Puentes afirma que entre os cidadáns hai unha "vontade maioritaria de cambio" que, ao seu xuízo, "só pode encabezar o PSOE" e que supoñería iniciar un novo tempo político "sen renunciar a todo o bo que se fixo".
"A iso dedicaremos todos os nosos esforzos sen perder nin un minuto", sinalou Puentes, que aposta porque Pontevedra reciba un "impulso de modernidade e actividade" que permita atraer investimentos, asentar novas empresas ou reforzar as políticas de protección social.
Relacionadas:
-
Iván Puentes será presentado na Ferrería como o candidato do PSOE á alcaldía de Pontevedra
Por Redacción |
-
A executiva do PSOE releva a Tino Fernández e designa a Iván Puentes novo portavoz do grupo municipal
Por Oskar Viéitez |
-
Iván Puentes asume a súa candidatura á alcaldía diante da Executiva Municipal da Agrupación Socialista
Por Anxo Lourido |
-
O PSOE 'oficializa' as súas primarias en Pontevedra e confirma a Tino Fernández e Iván Puentes como candidatos
Por Alejandro Espiño |
-
Tino Fernández ou Iván Puentes, só pode quedar un á fronte do PSOE pontevedrés
Por Alejandro Espiño |
-
11-D, data escollida polos socialistas para as primarias en Pontevedra
Por Anxo Lourido |