A Fundación Xoán XXIII prestará servizos de apoio ao emprego a 100 persoas con discapacidade ao longo deste 2023 nas comarcas de Pontevedra e do Morrazo. 

O programa conta co apoio da Xunta de Galicia e do Servizo Público de Emprego Estatal e diríxese a demandantes de emprego dos municipios de Pontevedra, Poio, Marín, Cangas e Moaña. 

As actividades presenciais realizaranse nas instalacións da Fundación de Pontevedra e Cangas, coa posibilidade de acceder a unha axuda para o transporte e a conciliación en casos de ter persoas a cargo.

A finais deste mes de xaneiro conclúe o proceso de selección de participantes, que serán persoas con discapacidade recoñecida mínima dun 33%. 

A formación para fomento de emprego desenvolverase entre febreiro e novembro deste ano con servizos axustados ás necesidades das persoas participantes con itinerarios personalizados e acompañamento en procesos de preparación laboral a medida no posto de traballo.

A Fundación Xoán XXIII, durante o últimos catro anos, suma máis de 200 empregos e máis de 100 empresas colaboradoras con este proxecto, que en moitos casos repiten todos os anos facilitando oportunidades de emprego.

O colectivo conta neste 2023 con novas instalacións situadas na rúa Pintor Urbano Lugrís, número 12, de Pontevedra, onde poden dirixirse aquelas persoas que precisen de información para acceder a este servizo. Tamén se pode chamar ao teléfono 986.869.296 ou dirixirse á oficina de emprego da localidade e solicitar a participación neste programa.