Belén Rubido, reelixida decana dos xuíces de Pontevedra para un segundo mandato
Por Natalia Puga
A maxistrada Belén Rubido de la Torre afrontará o seu segundo mandato como xuíza decana de Pontevedra, cargo que ocupa desde o ano 2018 en representación de todas as xuízas e xuíces do partido xudicial.
Rubido foi elixida de novo para o cargo nunha xunta de xuíces celebrada este martes con 16 votos a favor e tres en branco, tal e como deu a coñecer o Tribunal Superior de Xustiza de Galicia (TSXG).
Neste segundo mandato, márcase como obxectivos concluír a modernización do edificio xudicial da Parda, recortar os tempos de espera dos informes forenses do Instituto de Medicina Legal de Galicia (Imelga) e poñer en funcionamento un servizo común de videoconferencias.
Licenciada en Dereito pola Universidade de Valladolid, Rubido de la Torre ingresou na carreira xudicial no ano 2000 e empezou a súa traxectoria como titular do Xulgado de Primeira Instancia e Instrución de Vilagarcía de Arousa.
En 2005, ao ascender á categoría de maxistrada, incorporouse ao Xulgado de Instrución número 4 de Vigo, onde permaneceu ata o ano 2015, cando se trasladou ao Xulgado do Penal número 4 de Pontevedra, especializado en Violencia sobre a Muller e Violencia Doméstica, onde permanece na actualidade. Durante os anos 2018 e 2019 tamén exerceu como maxistrada en réxime de comisión de servizos sen relevación de funcións nas seccións segunda e quinta da Audiencia Provincial de Pontevedra.
En 2006 o Ministerio do Interior concedeulle a Cruz Branca ao Mérito Policial pola colaboración prestada ao Corpo Nacional de Policía e é moi activa na realización de conferencias e redacción de artigos de temática especializada en violencia de xénero e igualdade.
En cinco das súas edicións, exerceu como coordinadora-titora do Foro de Igualdade na Carreira Xudicial e o TSXG designouna delegada de Igualdade suplente da carreira xudicial para xuíces e maxistrados da comunidade autónoma.
Relacionadas:
-
O vello edificio xudicial da Parda estará en obras a partir de xuño
Por Redacción |
-
O antigo edificio xudicial da Parda, obxecto dunha mellora valorada en máis de 221.700 euros
Por Redacción |
-
O Consello da Maxistratura de Bos Aires coñece o proxecto "funcional" dos xulgados da Parda
Por Redacción |
-
Os xuíces pontevedreses poñen deberes á Xunta: que as obras dos vellos xulgados terminen "canto antes"
Por Natalia Puga |
-
"Non sei se as mulleres senten protexidas pola Xustiza española, pero estano. O sistema funciona e é duro"
Por Natalia Puga & Mónica Patxot |
-
O pleno do CGPJ reúnese no novo edificio xudicial e pon o foco na situación da xustiza en Pontevedra
Por Natalia Puga & Cristina Saiz |