"O ciclo do sabor", unha experiencia gastronómica de produtos gourmet no IES Luís Seoane
Por Redacción
O vindeiro xoves 16 de febreiro de 2023 organizarase no centro IES Luís Seoane, de Monte Porreiro, unha xornada para desfrutar e coñecer a fondo produtos galegos de calidade superior, guiada polo alumnado deste ciclo, que se imparte entre o IES Luís Seoane e o CIFP Carlos Oroza.
Con este título, "O ciclo do sabor", o alumnado non só busca remarcar o carácter educativo deste evento, senón que tamén expresa a súa propia esencia, baseada no percorrido que realizarán os participantes a través dos diversos sabores de produtos saudables e de proximidade.
Esta actividade supón unha boa oportunidade para coñecer a FP Dual, unha modalidade de formación de recente creación con moita proxección profesional que intercala un período de estudo de seis meses con seis meses de prácticas remuneradas nunha empresa.
Neste ciclo en concreto, Comercialización de Produtos Alimentarios, fórmase o alumnado para poder traballar a fronte das diferentes seccións dun comercio de alimentación, como son a peixería, a carnicería, a charcutería e a panadería, ademais de desenvolver as capacidades necesarias para realizar labores loxísticas e incluso emprender nun negocio no sector.
No proceso de ensino e aprendizaxe que supón esta xornada, o alumnado coñeceu a fondo múltiples produtos locais gourmet, como por exemplo o xamón de porco celta ou zumes naturais de mazás recollidas no Baixo Miño, descubrindo que gran parte da súa calidade non só se encontra no seu sabor, tamén na súa produción, posto que se trata de alimentos ecolóxicos que respectan o medio ambiente, o benestar animal e ademais aproveitan de maneira sostible as potencialidades de Galicia.
Tras esta rigorosa investigación fixéronse cargo, xunto co profesorado, da organización do evento, dende a elaboración do plan de márketing ao deseño da súa imaxe corporativa.
O alumnado tivo a oportunidade de preparar, con estes produtos de calidade, pratos saudables maximizando o seu sabor e facéndoos aínda máis innovadores. Os convidados serán guiados por el, dende os primeiros bocados aos últimos, co obxectivo de compartir momentos, coñecementos e moito sabor.
Relacionadas:
-
Unha semana de estrelas no CIFP Carlos Oroza
Por Redacción |
-
O "Plan Conecta FP Galicia" celebra o encontro territorial de Pontevedra no CIFP A Xunqueira
Por Álvaro Arosa Barco |
-
Sorpresa do conselleiro ao presentarse só unha empresa á reforma o IES Valle Inclán
Por Oskar Viéitez |
-
A Deputación e a Xunta xa están a falar da transferencia dos equipamentos educativos de Príncipe Felipe
Por Oskar Viéitez |
-
Os postos baleiros do 'gastromercado' sairán a licitación "en breve"
Por Natalia Puga |
-
A Misión Biolóxica de Galicia alíase con produtores, cociñeiros e formadores para divulgar os seus bancos de xermoplasma
Por Redacción |