Retiran pezas das Ruínas de San Domingos ante as inminentes obras no IES Valle Inclán
Por Alejandro Espiño
As inminentes obras de rehabilitación integral do IES Valle Inclán obrigaron ao Museo de Pontevedra a activar un plan preventivo para evitar que estes traballos poidan producir algún dano nas Ruínas de San Domingos, monumento co que comparte espazo.
Así, desde este luns e ao longo de toda esta semana, operarios do Museo están a retirar parte das pezas artísticas que atesouraban estas ruínas.
Estes traballos, que se están realizando con moito coidado polo valor destas obras e pola súa gran tonelaxe, están a levarse a cabo "por cuestións de conservación preventiva", segundo indican desde a institución museística a preguntas de PontevedraViva.
Ademais, o Museo quere contribuír a facilitar as obras de rehabilitación do instituto, que executará a empresa Construcciones Ramírez por 4,7 millóns de euros. O prazo de execución desta reforma prolongarase por espazo de catorce meses.
Todas as pezas que están a ser retiradas de Santo Domingo, convenientemente protexidas e embaladas, almacenaranse nas salas de reserva do Edificio Castelo.
Unha vez terminen as obras do instituto, regresarán ao seu lugar habitual.
Ese plan preventivo, segundo o Museo, non alterará o calendario previsto para reabrir ao público este conxunto histórico-artístico, que volverá recibir visitantes desde o próximo 1 de abril.
Relacionadas:
-
Educación xa pode comezar as obras de reforma do IES Valle Inclán
Por Alejandro Espiño |
-
Preocupación da comunidade escolar do IES Valle Inclán sobre as obras de reforma do centro
Por Oskar Viéitez |
-
Chegan catro meses e medio de visitas guiadas ás ruínas de San Domingos
Por Redacción |
-
Os obradoiros infantís de Semana Santa achegaranse a obras de artistas galegas
Por Redacción |
-
As Ruínas de San Domingos abrirán o 1 de abril xa preparadas para a nova tempada
Por Redacción |