Cultura, deporte e medio ambiente, protagonistas da terceira edición de Verbas en Flor
Por Redacción
Poio prepárase para celebrar unha nova edición do programa Verbas en Flor, unha axenda que este ano inclúe máis dunha ducia de actividades e iniciativas a desenvolver entre os meses de abril e maio.
Música, deporte, medio ambiente, tradición e, sobre todo, moita cultura son os eixos principais en torno aos cales xira o programa, presentado este venres pola concelleira de Cultura, Raquel Rodríguez, e a edil de Deportes, Marga Caldas.
O pistoletazo de saída da terceira edición o dará a undécima xornada da Liga Galega de Billarda, que se celebrará este sábado 1 de abril na Reiboa. Tamén haberá actuacións musicais, presentacións de libros, teatro, proxeccións audiovisuais e outras iniciativas "pensadas para toda a veciñanza e todas as idades", puntualizou Rodríguez Alonso.
Tamén estarán dentro da programación a Festa dos Maios e o Día das Letras Galegas, dous das grandes citas de referencia en Poio e que serán presentados nas vindeiras semanas. Un dos grandes puntos fortes do Verbas en Flor é que "a través desta programación espallamos actividades por todas as parroquias", indicou a concelleira de Cultura.
Durante o mes de abril, destaca o Concerto de Primavera que a Escola de Música (ESMU) ofrecerá o luns 3, ás 20.00 horas, na Praza da Granxa. Será unha actuación que supón a estrea de pezas sobre as obras gañadoras no Concurso Literario Xaime Illa de 2022. O día 11, o Centro Cultural Xaime Illa acollerá unha sesión de teatro para o alumnado do IES, mentres que para o xoves 20 de abril está fixada na praia de Cabeceira a xornada de recollida de plásticos na que tomarán parte alumnos e alumnas de diferentes centros educativos, en colaboración coa Asociación Amicos.
O venres 21 o Centro Cultural Xaime Illa acollerá proxeccións de cinema clásico, dentro do ciclo José Gil - Na orixe do cinema. Para pechar o mes, o sábado 22 a Praza da Chousa combinará varias propostas culturais, como a visita do Cinemóbil, unha sesión vermú co grupo Entre Foles e, previamente, a presentación do libro 'Nos días encantados de agosto', de Manuel González.
Xa no mes de maio, cobrará protagonismo a Festa dos Maios, co tradicional concurso na Praza do Mosteiro en horario de mañá e a Mostra de Maios vespertina en Combarro. Pechará esta programación o ciclo organizado co gallo do Día das Letras Galegas, que este ano está dedicado a Francisco Fernández del Riego.
A concelleira de Cultura lembra que a programación poderá consultarse na páxina web e nos perfís de redes sociais dos que dispón o Concello e Cultura Poio.
Relacionadas:
-
O programa cultural Verbas en Flor lembrará a traxectoria e obra do cineasta galego José Gil
-
Do 20 ao 26 de abril permanecerá aberta a inscrición para o concurso de Maios
Por Redacción |
-
Entrega dos premios do II Concurso de Poesía Xaquina Trillo
Por Redacción |
-
'Re(A)Mar, memorias do salitre', de Vero Rilo, no Casal de Ferreirós
Por Redacción |