Balsas de auga obrigan a cortar durante cinco horas a autovía entre Pontevedra e Marín
Por Diego Espiño & Diego Torrado
O temporal costeiro que na madrugada de venres a sábado atravesou a provincia obrigou a cortar durante unhas cinco horas a estrada PO-11, a autovía que une Pontevedra con Marín, en ambos os dous sentidos de circulación.
As causantes do corte foron as balsas de auga formadas sobre o asfalto coincidindo coa preamar, sobre as 6:00 da madrugada, o que sumado á intensa ondada provocou que a auga chegase aos catro carrís da vía.
Ás 8:30 horas desprazáronse ao lugar dous motobombas dos Bombeiros de Pontevedra para proceder ao achique da auga, podendo abrir ao tráfico primeiro dous dos carrís de circulación, os máis próximos á costa, e posteriormente os outros dous recuperando a normalidade, algo que non sucedeu ata pasadas as 11:00 horas.
A situación podería repetirse nas próximas preamares, polo que é aconsellable extremar as precaucións se se ten previsto circular por esta vía.