Máis de vinte quilos de residuos. É a cantidade de lixo que uns 140 escolares de Poio, convocados pola Asociación Amicos, retiraron da praia de Cabeceira.

Foi a través dunha xornada ambiental organizada para concienciar aos rapaces e rapazas participantes, procedentes de tres centros educativos, o CEIP Isidora Riestra, o CEIP Lourido e o IES de Poio, da importancia do coidado do litoral mariño das Rías Baixas.

A actividade, na que participaron trinta integrantes da asociación, retirou do areal dez quilos de plásticos, 6,5 quilos de mestura, un quilo de vidro e dous quilos de refugallos de papel.

"Para Amicos, hoxe é un día moi importante, porque forxamos unha nova alianza que nos permite seguir coa nosa tarefa de coidar do noso, coidando dos nosos", detallou a orientadora laboral da asociación, Diana Cidrás.

A xornada contou ademais coa presenza das edís Marga Caldas e Raquel Rodríguez, que destacaron que o futuro de Poio "pasa por iniciativas claramente, en verde, de concienciación e inclusión para que as novas xeracións vexan importancia de coidar do medio ambiente".