Só o 57% dos pontevedreses son PTV
Por Oskar Viéitez
O Instituto Galego de Estatística (IGE) desvela que o 57 por cento da poboación do municipio de Pontevedra reside na cidade do Lérez dende que naceu, mentres que o resto viven noutro concello ou provincia distinta.
Só o 14,8% da poboación pontevedresa é orixinario doutra Comunidade autónoma ou do estranxeiro. En Pontevedra teñen o seu fogar 3.496 inmigrantes, pouco máis do 4% do total do padrón municipal de habitantes.
No estudo bautizado como "Panorama dos sete grandes concellos de Galicia", elaborado polo IGE tamén sostén que Pontevedra ten a poboación máis nova entre as sete cidades galegas. A este dato súmase o índice de envellecemento máis baixo.
Os pontevedreses teñen unha media de idade de 42,15 anos, na que a idade media dos homes é de 40,4 anos, mentres a das mulleres é de 43,9.
En canto ás condicións de vida, o IGE recolle que máis de 14.800 fogares do municipio chegan con dificultade co fin de mes, o que supón o 54% do total.
A media de ingresos dos pontevedreses sitúase en 2.214 euros mensuais, un 9% menos que hai catro anos. A pesar deste dato, menos do 30% das familias pontevedresas poden aforrar algo a final de mes.